കുവൈത്തില്‍ കൊറോണ വൈറസ് ബാധിച്ച ഫിലിപ്പീന്‍സ്‌ യുവതിക്ക് സുഖപ്രസവം

കുവൈത്ത് സിറ്റി: കുവൈത്തില്‍ കൊറോണ വൈറസ് ബാധിതയായി ചികിസയില്‍ കഴിയുന്ന ഫിലിപ്പീന്‍ യുവതിക്ക് സുഖപ്രസവം. ഏഴു മാസം ഗര്‍ഭിണിയായ ഇവര്‍ ശസ്ത്രക്രിയയിലൂടെയാണ് കുഞ്ഞിന് ജന്മം നല്‍കിയത്. കനത്ത ആരോഗ്യ മുന്‍കരുതലുകളോടു കൂടിയാണ് യുവതിയുടെ ശസ്ത്രക്രിയ നടത്തിയത്. മാസം തികയാതെയുള്ള പ്രസവം ആയതിനാല്‍ വളര്‍ച്ച പൂര്‍ത്തിയാക്കുന്നതിന് വേണ്ടി കുഞ്ഞിനെ ഇന്‍കുബേറ്റര്‍ വാര്‍ഡിലേക്ക് മാറ്റി. അമ്മയുടെയും കുഞ്ഞിന്റെയും ആരോഗ്യ നില തൃപ്തികരമാണെന്ന് ആരോഗ്യമന്ത്രാലയം അധികൃതര്‍ അറിയിച്ചു.