ഷാര്‍ജയില്‍ മലയാളി വിദ്യാര്‍ത്ഥിയെ കാണാതായി

ഷാര്‍ജ: മലയാളിയും പത്താം ക്ലാസ്സ് വിദ്യാര്‍ത്ഥിയുമായ അമയ സന്തോഷിനെ (15) വെള്ളിയാഴ്ച മുതല്‍ കാണാനില്ലെന്ന് രക്ഷിതാക്കള്‍ അറിയിച്ചു. ഷാര്‍ജയിലെ ഡല്‍ഹി പ്രൈവറ്റ് സ്‌ക്കൂളില്‍ പഠിക്കുന്ന അമയ രാവിലെ ട്യൂഷന് പോയതിന് ശേഷം തിരിച്ചെത്തിയിട്ടില്ലെന്ന് മാതാവ് ബിന്ദു സന്തോഷ് അറിയിച്ചു. പിതാവ് സന്തോഷാണ് രാവിലെ വരെയുള്ള ട്യൂഷന്‍ ക്ലാസ്സില്‍ കൊണ്ട് വിട്ടിരുന്നത്. പരീക്ഷ പേടിയാകാം വീട്ടിലേക്ക് തിരിച്ച് വരാന്‍ മടിക്കുന്നതെന്ന് ബന്ധുക്കള്‍ അറിയിച്ചു. മകന്റെ സുഹൃത്തുക്കളുമായി രക്ഷിതാക്കള്‍ ബന്ധപ്പെട്ടെങ്കിലും യാതൊരു വിവരവും ലഭിച്ചിട്ടില്ല. ഷാര്‍ജയിലെ പ്രധാന ഷോപ്പിംഗ് മാളുകളിലെല്ലാം തിരച്ചില്‍ നടത്തിയെങ്കിലും കണ്ടെത്താന്‍ കഴിയാത്തതിനെ തുടര്‍ന്ന് അല്‍ ഗര്‍ബ് പോലീസ് സ്‌റ്റേഷനില്‍ പരാതി നല്‍കിയിട്ടുണ്ട്.