അഴിമതി ആരോപണം; ഷെയ്ഖ് ഹസീനയുടെ മരുമകള്‍ ബ്രിട്ടീഷ് മന്ത്രിസ്ഥാനം രാജിവച്ചു

ലണ്ടന്‍: യുകെയിലെ അഴിമതി വിരുദ്ധ മന്ത്രിയും ബംഗ്ലാദേശ് മുന്‍ പ്രധാനമന്ത്രി ഷെയ്ഖ് ഹസീനയുടെ മരുമകളുമായ തുലിപ് സിദ്ദിഖ് മന്ത്രിസ്ഥാനം രാജിവെച്ചു. ഹസീനയുടെ കീഴിലുള്ള ഭരണകൂടം തുലിപിനും കുടുംബത്തിനും സമ്മാനമായി നല്‍കിയ സ്വത്തുക്കള്‍ ഉപയോഗിച്ചതിനെ ബംഗ്ലാദേശ് ഇടക്കാല ഗവണ്‍മെന്റ് തലവന്‍ മുഹമ്മദ് യൂനുസ് വിമര്‍ശിച്ചതിന് പിന്നാലെയാണ് രാജി. കൂടാതെ, ഒരു അഴിമതിക്കേസുമായി എംഎസ് സിദ്ദിഖിന്റെ ഇടപെടലുകളെക്കുറിച്ചും വിമര്‍ശനമുയര്‍ന്നിരുന്നു.

ബംഗ്ലാദേശിലെ മുന്‍ ഭരണകൂടത്തിനെതിരെ നടന്നുകൊണ്ടിരിക്കുന്ന തട്ടിപ്പ് കേസ് അന്വേഷണത്തിലാണ് തുലിപ് വിമര്‍ശനം നേരിടുന്നത്. ബ്രിട്ടീഷ് പ്രധാനമന്ത്രി കെയര്‍ സ്റ്റാര്‍മര്‍ക്ക് നല്‍കിയ കത്തിലാണ് തുലിപ് രാജിക്കാര്യം വ്യക്തമാക്കിയത്. എന്റെ കുടുംബ ബന്ധങ്ങള്‍ പൊതു രേഖയുടെ കാര്യമാണ്. ഞാന്‍ മന്ത്രിയായപ്പോള്‍ എന്റെ ബന്ധങ്ങളുടെയും സ്വകാര്യ താല്‍പ്പര്യങ്ങളുടെയും മുഴുവന്‍ വിവരങ്ങളും സര്‍ക്കാരിന് നല്‍കി. ഉദ്യോഗസ്ഥരുമായി വിപുലമായ കൂടിയാലോചനകള്‍ക്ക് ശേഷം, എന്റെ എന്റെ അമ്മായി ബംഗ്ലാദേശിന്റെ മുന്‍ പ്രധാനമന്ത്രിയാണെന്നും ബംഗ്ലദേശുമായി ബന്ധപ്പെട്ട കാര്യങ്ങളില്‍ നിന്ന് സ്വയം പിന്മാറാനുമുള്ള ഉപദേശം ഉള്‍ക്കൊണ്ട് പ്രവര്‍ത്തിച്ചുവെന്നും അവര്‍ പറഞ്ഞു.

ധാക്കയുടെ പ്രാന്തപ്രദേശത്ത് ഭൂമി തട്ടിയെടുത്തെന്നാരോപിച്ച് ബംഗ്ലാദേശിലെ അഴിമതി വിരുദ്ധ കമ്മീഷന്‍ അന്വേഷണം നടത്തുന്നുണ്ട്. നേരത്തെ, ഹസീനയും തുലിപ് സിദ്ദിഖും മറ്റ് കുടുംബാംഗങ്ങളും റഷ്യന്‍ ധനസഹായത്തോടെയുള്ള ആണവ നിലയവുമായി ബന്ധിപ്പെട്ട് 5 ബില്യണ്‍ ഡോളര്‍ അപഹരിച്ചെന്ന ആരോപണവും അന്വേഷണ പരിധിയിലായിരുന്നു.

രണ്ട് ബംഗ്ലാദേശി വ്യവസായികളുമായി ബന്ധമുള്ള ഓഫ്ഷോര്‍ കമ്പനി വാങ്ങിയ ലണ്ടന്‍ ഫ്‌ലാറ്റില്‍ തുലിപ് സിദ്ദിഖ് വര്‍ഷങ്ങളോളം താമസിച്ചിരുന്നതായും ആരോപണം ഉണ്ട്. ഹസീനയുമായും കുടുംബവുമായും പുറത്താക്കപ്പെട്ട സര്‍ക്കാരുമായും ബന്ധമുള്ള ബംഗ്ലാദേശി അഭിഭാഷകന് ഫ്‌ലാറ്റ് സമ്മാനമായി കൈമാറിയതായി റിപ്പോര്‍ട്ടുണ്ട്. അവാമി ലീഗ് പാര്‍ട്ടിയുടെ അംഗങ്ങളോ കൂട്ടാളികളോ വാങ്ങിയ മറ്റ് നിരവധി സ്വത്തുക്കള്‍ സിദ്ദിഖിനും അവളുടെ കുടുംബത്തിനും നല്‍കുകയോ ഉപയോഗിക്കുകയോ ചെയ്തതായും റിപ്പോര്‍ട്ടില്‍ പറയുന്നു. തുടര്‍ന്നാണ് തുലിപ് രാജിവെക്കണമെന്ന ആവശ്യം പ്രതിപക്ഷം ശക്തമാക്കിയത്.