കൊച്ചിയിലെ ഷോപ്പിംഗ് മാളില്‍ യുവനടിയെ അപമനിച്ച സംഭവം: സിസിടിവി ദൃശ്യങ്ങളില്‍ നിന്നും പ്രതികളെ പോലിസ് തിരിച്ചറിഞ്ഞു

കൊച്ചി:കൊച്ചിയിലെ ഷോപ്പിംഗ് മാളില്‍ കുടുംബവുമൊത്ത് ഷോപ്പിംഗ് നടത്തവെ യുവ നടിയെ അപമാനിക്കാന്‍ ശ്രമിച്ച യുവാക്കളെ പോലിസ് തിരിച്ചറിഞ്ഞു. ഷോപ്പിംഗ് മാളിലെത്തി അന്വേഷണം നടത്തിയ പോലിസ് ഇവിടുത്തെ സിസിടിവി ദൃശ്യങ്ങള്‍ പരിശോധിച്ചതില്‍ നിന്നാണ് പ്രതികളായ രണ്ടു യുവാക്കളെ തിരിച്ചറിഞ്ഞിരിക്കുന്നത്.നടിയുടെ മൊഴിയെടുത്തശേഷം തുടര്‍ നടപടികളുമായി പോലിസ് മുന്നോട്ടു പോകുമെന്നാണ് വിവരം.മാളില്‍വെച്ച് രണ്ടു ചെറുപ്പക്കാര്‍ തന്നെ അപമാനിക്കാന്‍ ശ്രമിച്ച ശേഷം കടന്നു കളഞ്ഞതായി നടി സമൂഹമാധ്യമം വഴി വെളിപ്പെടുത്തിയതോടെയാണ് ഇത് സംബന്ധിച്ച വിവരം പുറം ലോകം അറിഞ്ഞത്.

അപമാനത്തിന്റെ ആഘാതത്തില്‍ ആ സമയത്ത് വേണ്ട വിധത്തില്‍ തനിക്ക് പ്രതികരിക്കാന്‍ കഴിഞ്ഞില്ലെന്നും നടി സമൂഹ മാധ്യമത്തിലൂടെ വെളിപ്പെടുത്തി.നേരിട്ട ദുരനുഭവത്തിന്റെ അനുഭവത്തിന്റെ ആഘാതത്തില്‍ തന്റെ മനസ് ശൂന്യമായി പോയെന്നും നടി സമൂഹ മാധ്യമത്തിലെ പോസ്റ്റില്‍ വ്യക്തമാക്കി. സംഭവത്തില്‍ പോലിസില്‍ പരാതി നല്‍കാന്‍ നടിയോ കുടുംബമോ ഇതുവരെ തയ്യാറായിട്ടില്ല.നടിയുടെ പരാതിയില്ലെങ്കില്‍ പോലും സംഭവത്തില്‍ പോലിസ് സ്വമേധയ കേസെടുത്തേക്കുമെന്നാണ് വിവരം. വനിത കമ്മിഷന്‍ സ്വമേധയാ കേസെടുത്തു.നാളെ നടിയെ കണ്ട് വിവരങ്ങള്‍ ചോദിച്ചറിയുമെന്ന് വനിതാ കമ്മീഷന്‍ അധ്യക്ഷ എം സി ജോസഫൈന്‍ നേരത്തെ വ്യക്തമാക്കിയിരുന്നു.