സ്പീക്കര്‍ പി ശ്രീരാമകൃഷ്ണന്റെ കൊവിഡ് പരിശോധനാ ഫലവും നെഗറ്റീവ്

തിരുവനന്തപുരം: നിരീക്ഷണത്തില്‍ കഴിയുന്ന സ്പീക്കര്‍ പി ശ്രീരാമകൃഷ്ണന്റെ കൊവിഡ് പരിശോധനാഫലവും നെഗറ്റീവ്. മുഖ്യമന്ത്രി പിണറായി വിജയന്റെയും ആരോഗ്യമന്ത്രി കെ കെ ശൈലജയുടെയും ആന്റിജന്‍ പരിശോധനാഫലം നേരത്തെ നെഗറ്റീവായിരുന്നു. മന്ത്രിമാരായ വി എസ് സുനില്‍കുമാറിന്റെയും എ സി മൊയ്തീന്റെയും ഇ പി ജയരാജന്റെയും ആന്റിജന്‍ പരിശോധനാഫലവും നെഗറ്റീവാണ്. കൊവിഡ് സ്ഥിരീകരിച്ച മലപ്പുറം കലക്ടറുടെ സമ്പര്‍ക്ക പട്ടികയില്‍ വന്നതിനെ തുടര്‍ന്നാണ് മന്ത്രിമാരും സ്പീക്കറും ഡിജിപിയും സ്വയം നിരീക്ഷണത്തില്‍ പ്രവേശിച്ചത്.

കരിപ്പൂര്‍ വിമാനാപകടസമയത്താണ് മുഖ്യമന്ത്രി പിണറായി വിജയന്‍, മന്ത്രിമാരായ ഇ പി ജയരാജന്‍, കെ കെ ശൈലജ, എ കെ ശശീന്ദ്രന്‍, എ സി മൊയ്തീന്‍, വി എസ് സുനില്‍കുമാര്‍, കടന്നപ്പള്ളി രാമചന്ദ്രന്‍, ഡോ. കെ ടി ജലീല്‍ എന്നീ മന്ത്രിമാരും സ്പീക്കര്‍ ശ്രീരാമകൃഷ്ണന്‍ എന്നിവര്‍ക്ക് കലക്ടറുമായി സമ്പര്‍ക്കമുണ്ടായത്. ഗവര്‍ണര്‍ ആരിഫ് മുഹമ്മദ് ഖാനും മുഖ്യമന്ത്രി അടക്കമുള്ളവരുടെ സംഘത്തിലുണ്ടായിരുന്നു. പരിശോധനാഫലം നെഗറ്റീവാണെങ്കിലും മുഖ്യമന്ത്രിയും മന്ത്രിമാരും നിലവില്‍ നിരീക്ഷണത്തില്‍തന്നെയാണ്.