നരേന്ദ്രമോദിയെ പ്രശംസിച്ചതില്‍ മാപ്പുപറയില്ലെന്ന് ശശി തരൂര്‍

തിരുവനന്തപുരം: പ്രധാനമന്ത്രി നരേന്ദ്രമോദിയെ പ്രശംസിച്ചതില്‍ മാപ്പുപറയില്ലെന്ന് വ്യക്തമാക്കി ശശി തരൂര്‍. 2014ല്‍ പറഞ്ഞകാര്യം തന്നെയാണ് താന്‍ ഇപ്പോഴും പറയുന്നത്. മോദിയെ പ്രശംസിച്ചത് വ്യക്തിപരമായ നിലപാടാണ്. നല്ല കാര്യങ്ങള്‍ ചെയ്യുന്ന ആളുകളെ വ്യക്തിബന്ധത്തില്‍ പ്രശംസിക്കുമ്പോള്‍ രാഷ്ട്രീയത്തിലും എന്തുകൊണ്ട് ആയിക്കൂടാ. എല്ലാ സമയത്തും കുറ്റം പറഞ്ഞ് കൊണ്ടിരുന്നാല്‍ ആളുകള്‍ നമ്മേ വിശ്വസിക്കാന്‍ പോകുന്നില്ലെന്നും തരൂര്‍ പറഞ്ഞു.

പ്രധാനമന്ത്രി നരേന്ദ്രമോദിയെ എപ്പോഴും ദുഷ്ഠനായി ചിത്രീകരിക്കേണ്ടതില്ലെന്ന് താനടക്കമുള്ള ചില കോണ്‍ഗ്രസ് കഴിഞ്ഞദിവസം നടത്തിയ പ്രസ്താവനയോട് പ്രതികരിക്കുകയായിരുന്നു തരൂര്‍. ജയറാം രമേശും മനുഅഭിഷേക് സിങ്വിയും സമാനമായ അഭിപ്രായ പ്രകടനം നടത്തിയിരുന്നു. മോദി ചെയ്ത ചിലകാര്യങ്ങള്‍ ജനങ്ങളുടെ മനസ്സില്‍ ഇടംപിടിച്ചിട്ടുണ്ട്. അദ്ദേഹം ബിജെപിയുടെ മാത്രം പ്രധാനമന്ത്രിയല്ലെന്നും രാജ്യത്തിന്റെ പ്രധാനമന്ത്രിയാണെന്നും ശശി തരൂര്‍ അഭിപ്രായപ്പെട്ടു.

അതേസമയം, പ്രധാനമന്ത്രി നരേന്ദ്രമോദിക്ക് നല്ല സര്‍ട്ടിഫിക്കറ്റ് നല്‍കുന്നതല്ല കോണ്‍ഗ്രസിന്റെ പണിയെന്ന് എഐസിസി ജനറല്‍ സെക്രട്ടറി കെ.സി വേണുഗോപാല്‍ പറഞ്ഞു. ജയറാം രമേശിന്റെ പ്രസ്ഥാവന വ്യക്തിപരമാണെന്നും അദ്ദേഹം പറഞ്ഞു.