ആള്‍ക്കൂട്ട കൊല: നിയമസഭ പ്രമേയം പാസാക്കും

തിരുവനന്തപുരം: ആള്‍ക്കൂട്ട കൊലപാതകങ്ങള്‍ക്കെതിരെ നിയമസഭ പ്രമേയം പാസാക്കുമെന്നു മുഖ്യമന്ത്രിക്കു വേണ്ടി വ്യവസായ മന്ത്രി ഇ പി ജയരാജന്‍ അറിയിച്ചു. ആള്‍ക്കൂട്ട കൊലപാതകങ്ങള്‍ തടയാന്‍ കര്‍ശന നിയമനിര്‍മ്മാണം നടത്തണമെന്ന ആവശ്യം ഉന്നയിച്ച് ഡോ.എം കെ മുനീര്‍ അവതരിപ്പിച്ച സബ്മിഷന് മറുപടി പറയുകയായിരുന്നു അദ്ദേഹം.

ഉത്തരേന്ത്യയില്‍ നടക്കുന്ന സംഭവങ്ങള്‍ക്കു സമാനമായ രീതിയില്‍ ഇവിടെയും ആള്‍ക്കൂട്ട ആക്രമങ്ങള്‍ നടക്കുകയാണ്. നിയമത്തിലെ പഴുതുകള്‍ കാരണം കര്‍ശന ശിക്ഷ ഉറപ്പാക്കാന്‍ കഴിയാത്ത സാഹചര്യമുണ്ട്. നിയമനിര്‍മ്മാണത്തിലൂടെ ഇത്തരം സംഘടിത ആക്രമങ്ങള്‍ക്കെതിരെ കേരളം മാതൃക കാട്ടണമെന്നും മുനീര്‍ ആവശ്യപ്പെട്ടു.

അതേസമയം, നിയമസഭ ഇക്കാര്യത്തില്‍ ഒറ്റക്കെട്ടായി പ്രമേയം പാസാക്കണമെന്നു പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. തുടര്‍ന്നാണ് സഭ പ്രമേയം പാസാക്കുന്ന കാര്യം സര്‍ക്കാര്‍ പരിഗണിക്കുമെന്നു വ്യവസായ വകുപ്പു മന്ത്രി വ്യക്തമാക്കിയത്.