എയര്‍ഫോഴ്സ് വിമാനം കണ്ടെത്തുന്നതിന് തിരച്ചില്‍ ഊര്‍ജിതമാക്കണം: മുഖ്യമന്ത്രി

തിരുവനന്തപുരം: അരുണാചല്‍ പ്രദേശില്‍ അപ്രത്യക്ഷമായ എയര്‍ഫോഴ്സ് വിമാനം കണ്ടെത്തുന്നതിന് ലഭ്യമായ എല്ലാ ആധുനിക സംവിധാനങ്ങളും ഉപയോഗിച്ച് തുടര്‍ച്ചയായ തിരച്ചില്‍ നടത്തണമെന്ന് കേന്ദ്ര പ്രതിരോധമന്ത്രി രാജ്നാഥ് സിങ്ങിനോട് മുഖ്യമന്ത്രി പിണറായി വിജയന്‍ അഭ്യര്‍ഥിച്ചു.

ജൂണ്‍ മൂന്നിനാണ് എഎന്‍-32 ഇനത്തില്‍ പെടുന്ന എയര്‍ഫോഴ്സ് വിമാനം അപ്രത്യക്ഷമായത്. പ്രതിരോധ മന്ത്രാലയം വിവിധ ഏജന്‍സികളുടെ സഹായത്തോടെ വിമാനവും അതിലെ സൈനികരെയും കണ്ടെത്തുന്നതിന് നടത്തുന്ന ശ്രമങ്ങളില്‍ മുഖ്യമന്ത്രി മതിപ്പ് പ്രകടിപ്പിച്ചു. എന്നാല്‍ ഓരോ ദിവസം കഴിയുന്തോറും കാണാതായ സൈനികരുടെ കുടുംബങ്ങളുടെ ഉല്‍കണ്ഠ വര്‍ധിക്കുകയാണ്. അവര്‍ മാനസികമായി തകര്‍ന്നിരിക്കുന്നു.

മാധ്യമങ്ങള്‍ റിപ്പോര്‍ട്ട് ചെയ്തതനുസരിച്ച് കാണാതായവരില്‍ മൂന്നു മലയാളികളുമുണ്ട്. അനൂപ് കുമാര്‍ (കൊല്ലം), ഷെറിന്‍ (കണ്ണൂര്‍), വിനോദ്കുമാര്‍ (പാലക്കാട്) എന്നീ മലയാളികളാണ് വിമാനത്തിലുണ്ടായിരുന്നത്. സംസ്ഥാന സര്‍ക്കാര്‍ നിരന്തരം പ്രതിരോധ മന്ത്രാലയവുമായും എയര്‍ഫോഴ്സ് അധികൃതരുമായും ബന്ധപ്പെട്ടുകൊണ്ടിരിക്കുകയാണ്. കാണാതായവരെ കണ്ടെത്തുന്നതിനുള്ള തിരച്ചില്‍ ഊര്‍ജിതമാക്കുന്നതിന് പ്രതിരോധമന്ത്രിയുടെ പ്രത്യേക ഇടപെടല്‍ ഉണ്ടാവണമെന്ന് മുഖ്യമന്ത്രി അഭ്യര്‍ത്ഥിച്ചു.