പോലിസ് തലപ്പത്ത് അഴിച്ചുപണി; മനോജ് ഏബ്രഹാം ആംഡ് ബറ്റാലിയന്‍ എഡിജിപി

തിരുവനന്തപുരം: പോലിസ് തലപ്പത്ത് അഴിച്ചുപണി. എഡിജിപിയായി സ്ഥാനക്കയറ്റം കിട്ടിയ മനോജ് ഏബ്രഹാമിനെ ആംഡ് പൊലീസ് ബറ്റാലിയന്‍ എഡിജിപിയായി നിയമിച്ചു. കേരള പൊലീസ് ഹൗസിങ് ആന്‍ഡ് കണ്‍സ്ട്രക്ഷന്‍ കോര്‍പറേഷന്‍ ലിമിറ്റഡ് സിഎംഡി ശങ്കര്‍ റെഡ്ഡിയെ റോഡ് സുരക്ഷാ കമ്മിഷണറായി നിയമിച്ചു. ഇതിനായി എക്‌സ് കേഡര്‍ തസ്തിക സൃഷ്ടിച്ചു.

ഡിഐജിയായി സ്ഥാനക്കയറ്റം കിട്ടിയ കോരി സഞ്ജയ് കുമാര്‍ ഗരുഡ്, എ അക്ബര്‍, കാളിരാജ് മഹേഷ് കുമാര്‍ എന്നിവരേയും മറ്റു വകുപ്പുകളിലേക്ക് മാറ്റി. കെഎപി നാലാം ബറ്റാലിയന്‍ കമന്‍ഡാന്റ് കോരി സഞ്ജയ് കുമാര്‍ ഗരുഡിനെ പൊലീസ് ആസ്ഥാനത്ത് ഡിഐജിയായും സെക്യൂരിറ്റി എസ്പി എ.അക്ബറിനെ ഡിഐജി (സെക്യൂരിറ്റി) ആയും കോഴിക്കോട് ജില്ലാ പൊലീസ് മേധാവി കാളിരാജ് മഹേഷ് കുമാറിനെ പൊലീസ് മേധാവി(കോഴിക്കോട്)യായുമാണ് നിയമിച്ചത്.

പൊലീസ് ട്രെയിനിങ് കോളജ് പ്രിന്‍സിപ്പല്‍ ശ്യാം സുന്ദറിനെ കേരള പൊലീസ് ഹൗസിങ് കണ്‍സ്ട്രക്ഷന്‍ കോര്‍പറേഷന്‍ സിഎംഡിയായി നിയമിച്ചു. ആലപ്പുഴ എസ്പിയായി സ്ഥാനകയറ്റം നല്‍കി നിയമിച്ച സുജിത് ദാസിനെ കണ്ണൂര്‍ കെഎപി ബറ്റാലിയന്‍ കമന്‍ഡാന്റായി നിയമിച്ചു.