നടന്‍ ജോജു ജോര്‍ജ്ജിന്റെ കാര്‍ അടിച്ചു തകര്‍ത്ത സംഭവം: പ്രതികളെ തിരിച്ചറിഞ്ഞുവെന്ന് പോലിസ്

കൊച്ചി: ഇന്ധന വില വര്‍ധിപ്പിച്ചതില്‍ പ്രതിഷേധിച്ച് കോണ്‍ഗ്രസ് പ്രവര്‍ത്തകര്‍ വൈറ്റിലയില്‍ സംഘടിപ്പിച്ച സമരത്തില്‍ റോഡ് ഉപരോധിക്കുകയും, വാഹനങ്ങള്‍ തടയുകയും ചെയ്തത് ചോദ്യം ചെയ്ത നടന്‍ ജോജു ജോര്‍ജ്ജിന്റെ കാര്‍ അടിച്ചു തകര്‍ത്തവരെ വ്യക്തമായി തിരിച്ചറിഞ്ഞുവെന്നും വരും ദിവസങ്ങളില്‍ ഇവരെ അറസ്റ്റു ചെയ്യുമെന്നും മരട് പോലിസ് അറിയിച്ചു.

പ്രതികളുടെ ഫോട്ടോ ഉള്‍പ്പെടെ വീഡിയോ ദൃശ്യങ്ങള്‍ പോലിസിന് ലഭിച്ചിട്ടുണ്ടെന്നും പോലിസ് പറഞ്ഞു. പ്രതിഷേധക്കാരുമായുണ്ടായ പിടിവലിയില്‍ ജോജുവി ന് പരിക്കേറ്റിട്ടുണ്ടെന്നും പോലിസ് പറഞ്ഞു.

ജോജു ജോര്‍ജ്ജിന്റെ പരാതിയിലാണ് കേസെടുത്തത്.കൂടാതെ നടുറോഡില്‍ ഇരുന്ന് സമരം നടത്തിയതിനും വാഹനങ്ങള്‍ തടഞ്ഞതിനും കോണ്‍ഗ്രസ് പ്രവര്‍ത്തകര്‍ക്കെതിരെ മറ്റൊരു കേസുകൂടി മരട് പോലിസ് രജിസ്റ്റര്‍ ചെയ്തിട്ടുണ്ട്.