ന്യൂജേഴ്‌സിയില്‍ കൊവിഡ് 19 ബാധിച്ച് മലയാളി വൃദ്ധ മരിച്ചു

കൊച്ചി: കൊവിഡ-19ബാധിച്ച് കൊച്ചി കാക്കനാട് സ്വദേശിനിയായ വൃദ്ധ ന്യുജേഴ്സിയില്‍ മരിച്ചു. കാക്കനാട് താമസിച്ചിരുന്ന പത്തനംതിട്ട സ്വദേശി സാമുവലിന്റെ ഭാര്യ കുഞ്ഞമ്മ (85) യാണ് മരിച്ചത്. സാമുവലിന്റെ മരണത്തിന് ശേഷമാണ് കുഞ്ഞമ്മ മകള്‍ ലൂസിയ്ക്കൊപ്പം ന്യൂജഴ്സിയില്‍ സ്ഥിരതാമസമാക്കിയത്. രാമമംഗലം സ്വദേശി വര്‍ഗീസിന്റെ ഭാര്യയാണ് ലൂസി. ന്യുജേഴ്സിയിലെത്തിയ കുഞ്ഞമ്മ അവിടെ മൈക്രോബയോളജിസ്റ്റായി ജോലി നോക്കിയിരുന്നു. മകന്‍: മോഹന്‍ (മുംബൈ). ന്യുജേഴിസിയില്‍ മകളോടൊത്ത് താമസിച്ചിരുന്ന കുഞ്ഞമ്മ കാലിന് പരിക്കുപറ്റി ഒരു മാസമായി ആശുപത്രിയിലായിരുന്നു. ഇതിനിടെ ആശുപത്രിയില്‍ വച്ചാണ് ഇവര്‍ക്ക് കോവിഡ് ബാധ പിടിപ്പെട്ടതെന്നാണ് നിഗമനം.