ക്രിക്കറ്റ് മത്സരം കാണാനെത്തിയ വിജയ് മല്യയെ 'കള്ളന്‍' എന്ന് കൂക്കിവിളിച്ച് ഇന്ത്യക്കാര്‍

#WATCH London, England: Vijay Mallya says, "I am making sure my mother doesn't get hurt", as crowd shouts "Chor hai" while he leaves from the Oval after the match between India and Australia. pic.twitter.com/ft1nTm5m0i

— ANI (@ANI) June 9, 2019

ലണ്ടന്‍: രാജ്യത്തെ ബാങ്കുകളില്‍ ശതകോടികളുടെ വായ്പാ തട്ടിപ്പ് നടത്തി നാടുവിട്ട വിവാദ മദ്യവ്യവസായി വിജയ് മല്യയെ 'കള്ളന്‍' എന്ന് കൂക്കിവിളിച്ച് ഇന്ത്യക്കാരായ കാണികള്‍. ലണ്ടനില്‍ നടക്കുന്ന ഇന്ത്യ-ഓസ്‌ട്രേലിയ ലോകകപ്പ് മത്സരം കാണാനെത്തിയതായിരുന്നു മല്യ.

ലണ്ടനിലെ കെന്നിങ്ടണ്‍ ഓവല്‍ സ്‌റ്റേഡിയത്തില്‍ നടന്ന ഇന്ത്യയുടെ രണ്ടാം മത്സരം കാണാനായി മല്യ എത്തുന്നതിന്റെ ദൃശ്യങ്ങള്‍ സഹിതം ദേശീയ വാര്‍ത്ത ഏജന്‍സിയായ എഎന്‍ഐ ആണ് റിപ്പോര്‍ട്ട് ചെയ്തത്. 'ഇയാളൊരു കളളനാണ്,' എന്നാണ് ആള്‍ക്കൂട്ടം വിളിച്ച് പറയുന്നത്. ആള്‍ക്കൂട്ടം വിജയ് മല്യക്കെതിരെ മുദ്രാവാക്യം വിളിക്കുന്നത് വീഡിയോയില്‍ കാണാം.

കേസ് സംബന്ധിച്ച ചോദ്യങ്ങളില്‍ നിന്നൊക്കെ ഒഴിഞ്ഞുമാറിയ മല്യ, ജൂലൈയില്‍ നടക്കുന്ന വാദംകേള്‍ക്കലിനുള്ള കാര്യങ്ങള്‍ ചെയ്തു വരികയാണെന്ന് വ്യക്തമാക്കി. മല്യയുടെ കേസ് വരുന്ന ജൂലായില്‍ ആണ് വാദം കേള്‍ക്കുന്നത്. അതിന് വേണ്ടിയുളള തയ്യാറെടുപ്പുകള്‍ നടന്ന് വരുന്നതായി വിജയ് മല്യ പ്രതികരിച്ചു. ഇത് ആദ്യമായല്ല ക്രിക്കറ്റ് സ്‌റ്റേഡിയത്തില്‍ മല്യ കൂക്കി വിളിക്കപ്പെടുന്നത്. 2017 ജനുവരിയില്‍ ഇതേ സ്‌റ്റേഡിയത്തില്‍ നടന്ന ഇന്ത്യദക്ഷിണാഫ്രിക്ക ചാമ്പ്യന്‍സ് ട്രോഫി മത്സരം കാണാനെത്തിയപ്പോഴും മല്യ 'കളളന്‍' വിളി കേള്‍ക്കേണ്ടി വന്നിരുന്നു.