സ്‌കൂളില്‍ നിന്ന് പുറത്താക്കിയ വിദ്യാര്‍ഥി അധ്യാപികയുടെ ദേഹത്ത് പെട്രോള്‍ ഒഴിച്ച് കത്തിച്ചു

ഭോപ്പാല്‍: പ്രണയം നിരസിച്ചതിന്റെയും പരാതി നല്‍കിയതിന്റെയും പേരില്‍ അധ്യാപികയെ പെട്രോളൊഴിച്ച് തീ കൊളുത്തി പൂര്‍വവിദ്യാര്‍ഥി. മധ്യപ്രദേശിലാണ് സംഭവം.18 വയസുള്ള സൂര്യംശ് കോച്ചാര്‍ ആണ് കേസില്‍ അറസ്റ്റിലായിരിക്കുന്നത്. നര്‍സിംഗ്പുരിലെ എക്‌സെലന്‍സ് സ്‌കൂളിലെ പൂര്‍വ വിദ്യാര്‍ഥിയായിരുന്നു സൂര്യാംശ്. പഠന കാലത്ത് ഗസ്റ്റ് അധ്യാപികയുമായി വിദ്യാര്‍ഥി അടുപ്പത്തിലായിരുന്നു. പിന്നീട് അത് പ്രണയമായി മാറിയിരുന്നുവെന്നും പോലിസ്. രണ്ട് വര്‍ഷം മുന്‍പ് ഓഗസ്റ്റ് 15ന് അധ്യാപികയോടെ സൂര്യാംശ് മോശമായി സംസാരിച്ചിരുന്നു. ഇതിനെതിരേ അധ്യാപിക സ്‌കൂളില്‍ പരാതി നല്‍കി.

ഇതോടെ സൂര്യാംശിനെ സ്‌കൂളില്‍ നിന്ന് പുറത്താക്കിയിരുന്നു. പിന്നീട് സൂര്യാംശ് മറ്റൊരു സ്‌കൂളിലാണ് പഠനം പൂര്‍ത്തിയാക്കിയത്. ചൊവ്വാഴ്ച വൈകിട്ട് 3 മണിയോടെ അധ്യാപികയുടെ വീട്ടിലേക്കെത്തിയ സൂര്യാംശ് കൈയില്‍ കരുതിയ പെട്രോള്‍ അവരുടെ ദേഹത്തേക്കൊഴിച്ച് തീ കൊളുത്തുകയായിരുന്നു. തൊട്ടു പിന്നാലെ പ്രതി സ്ഥലത്ത് നിന്ന് ഓടി രക്ഷപ്പെട്ടു. അധ്യാപികയെ ഉടന്‍ തന്നെ ആശുപത്രിയിലെത്തിച്ചെങ്കിലും 15 ശതമാനം പൊള്ളലേറ്റതിനാല്‍ ചികില്‍സയില്‍ തുടരുകയാണ്.