വെടിനിർത്തൽ തീരുമാനം സ്വാഗതം ചെയ്ത് അന്താരാഷ്ട്ര ആണവോർജ ഏജൻസി ; നയതന്ത്ര ചർച്ചകൾക്ക് പിന്തുണ പ്രഖ്യാപിച്ചു

ഇറാനും അമേരിക്കയും തമ്മിലുള്ള വെടിനിർത്തൽ തീരുമാനത്തെ അന്താരാഷ്ട്ര ആണവോർജ ഏജൻസി (IAEA) സ്വാഗതം ചെയ്തു. ഇറാന്റെ ആണവ പദ്ധതിയെ ഉൾപ്പെടെ പ്രധാന വിഷയങ്ങളിൽ സ്ഥിരമായ പരിഹാരം കണ്ടെത്താൻ നടക്കുന്ന നയതന്ത്ര ശ്രമങ്ങൾക്ക് പിന്തുണ നൽകാൻ തങ്ങൾ സജ്ജമാണെന്ന് ഡയറക്ടർ ജനറൽ റാഫേൽ ഗ്രോസ്സി അറിയിച്ചു.

ഐക്യരാഷ്ട്ര സഭയുടെ ആണവ മേൽനോട്ട ഏജൻസിയായ IAEA പുറത്തിറക്കിയ പ്രസ്താവനയിൽ, “ഇറാന്റെ ആണവ പദ്ധതിയെ ഉൾപ്പെടെ പ്രധാന വിഷയങ്ങളിൽ ധാരണയിലെത്താൻ ലക്ഷ്യമിട്ട് നയതന്ത്ര ചർച്ചകൾ വീണ്ടും ആരംഭിക്കുന്നത് സ്വാഗതാർഹമാണ്,” എന്ന് വ്യക്തമാക്കി.

കൂടാതെ, ആവശ്യമായ സുരക്ഷാ മേൽനോട്ടവും പരിശോധനാ സംവിധാനങ്ങളും വഴി ഈ ശ്രമങ്ങൾക്ക് പിന്തുണ നൽകാൻ ഐഎഇഎ തയ്യാറാണെന്നും പ്രസ്താവനയിൽ കൂട്ടിച്ചേർത്തു.

സീസ്ഫയർ പ്രഖ്യാപനത്തോടെ യുദ്ധത്തിലെ സംഘർഷം കുറയുന്ന സാഹചര്യത്തിൽ, സമാധാനപരമായ പരിഹാരത്തിനുള്ള അന്താരാഷ്ട്ര പ്രതീക്ഷകളും ശക്തിപ്രാപിക്കുകയാണ്.