20 കോണ്‍ഗ്രസ് അംഗങ്ങളും ബിജെപിയിലേക്ക് കൂറുമാറി; മിസോറാമിലെ ജില്ലാകൗണ്‍സില്‍ ഭരണം ബിജെപി പിടിച്ചു

ഐസ്വാള്‍: ലോക്‌സഭാ തിരഞ്ഞെടുപ്പിലെ തോല്‍വിക്കു പിന്നാലെ കോണ്‍ഗ്രസിനു കനത്ത തിരിച്ചടി നല്‍കി മിസോറാമിലെ ജില്ലാ കൗണ്‍സില്‍ ഭരണം ബിജെപിക്ക്. തദ്ദേശ തിരഞ്ഞെടുപ്പില്‍ ഒരു സീറ്റിലും ബിജെപി ജയിക്കാത്ത മിസോറാമിലെ മറാ ജില്ലാ കൗണ്‍സിലിലാണ് കോണ്‍ഗ്രസ് അംഗങ്ങളെല്ലാം കൂറുമാറിയതിനെ തുടര്‍ന്ന് ഭരണം ബിജെപി പിടിച്ചെടുത്തത്. മൂന്നു നോമിനേറ്റഡ് അംഗങ്ങള്‍ ഉള്‍പ്പെടെ 20 കോണ്‍ഗ്രസ് അംഗങ്ങളാണ് ബിജെപിയിലേക്ക് കൂറുമാറിയത്. ഏറെക്കാലം കോണ്‍ഗ്രസ് ഭരിച്ചിരുന്ന സംസ്ഥാനത്തെ ഒരു ജില്ലാ കൗണ്‍സിലിലാണ് ഫലത്തില്‍ കോണ്‍ഗ്രസ് ബിജെപിയില്‍ ലയിച്ചത്. കഴിഞ്ഞ നിയമസഭാ തിരഞ്ഞെടുപ്പില്‍ സംസ്ഥാനത്ത് കോണ്‍ഗ്രസ് പരാജയപ്പെടുകയും മിസോ നാഷനല്‍ ഫ്രണ്ട് ഭരണം പിടിച്ചെടുക്കുകയും ചെയ്തതോടെയാണ് കോണ്‍ഗ്രസ് അംഗങ്ങളെല്ലാം കൂറുമാറിയതെന്നാണു സൂചന. ഇക്കഴിഞ്ഞ് 19ന് ജില്ലാ സമിതി പിരിച്ചുവിട്ടതിനു പിന്നാലെ കോണ്‍ഗ്രസ് അംഗങ്ങളെല്ലാം മുന്‍കൈയെടുത്താണ് ലയനം നടന്നതെന്നാണ് ബിജെപി സംസ്ഥാന അധ്യക്ഷന്‍ ജെവി ഹ്ലുണ പറഞ്ഞു. ഇത് കോണ്‍ഗ്രസുമായുള്ള സഖ്യം ചേരലല്ല. പലഘട്ടങ്ങളിലായി നടന്ന ചര്‍ച്ചകളുടെ ഫലമായാണ് ഇത്തരമൊരു തീരുമാനമെടുത്തത്. തീരുമാനത്തിന് ബിജെപി കേന്ദ്ര നേതാക്കളുടെ അനുമതി ലഭിച്ചിരുന്നുവെന്നും അദ്ദേഹം പറഞ്ഞു.

കോണ്‍ഗ്രസ് നേതാവായിരുന്ന എന്‍ സകായിയുടെ നേതൃത്വത്തില്‍ കൗണ്‍സില്‍ പാര്‍ട്ടി രൂപീകരിക്കുമെന്നും സര്‍ക്കാരിനോട് ഭൂരിപക്ഷം അവകാശപ്പെടുമെന്നും ബിജെപി നേതാവ് ജെ വി ലുന പറഞ്ഞു. 2017ലാണ് മറാ സ്വയംഭരണ ജില്ല കൗണ്‍സിലിലേക്ക്(എംഎഡിസി) തിരഞ്ഞെടുപ്പ് നടന്നത്. ആകെയുള്ള 25 സീറ്റില്‍ 17 സീറ്റിലും കോണ്‍ഗ്രസ് വിജയിച്ചു. അഞ്ചുസീറ്റുകളില്‍ മിസോ നാഷനല്‍ ഫ്രണ്ടും(എംഎന്‍എഫ്) ഇവരുടെ സഖ്യകക്ഷിയായ മാറാലാന്റ് ഡമോക്രാറ്റിക് ഫ്രണ്ടും(എംഡിഎഫ്) രണ്ടിടത്തും ജയിച്ചു. ഒരു സീറ്റില്‍ സ്വതന്ത്രനാണു ജയിച്ചത്. ഇക്കഴിഞ്ഞ ഒക്ടോബറില്‍ എംഎന്‍എഫുമായി പിരിഞ്ഞ എംഡിഎഫിന്റെ രണ്ടു പ്രതിനിധികളും ബിജെപിയില്‍ ചേര്‍ന്നിരുന്നു. മൂന്ന് പേരെ കോണ്‍ഗ്രസ് കൗണ്‍സിലിലേക്ക് നോമിനേറ്റ് ചെയ്തു. ഇപ്പോള്‍, കോണ്‍ഗ്രസ് പ്രതിനിധികളെല്ലാം രേഖാമൂലം ബിജെപിയിലേക്ക് ചേക്കേറിയതോടെ മൂന്നില്‍ രണ്ട് ഭൂരിപക്ഷത്തോടെയാണ് ബിജെപി അധികാരത്തിലെത്തുന്നത്. 15 കോണ്‍ഗ്രസ് അംഗങ്ങളും ഇക്കാര്യം സ്ഥിരീകരിച്ചെന്നും അഞ്ചുപേരെ ഫോണില്‍ ബന്ധപ്പെട്ടപ്പോള്‍ ലഭിച്ചില്ലെന്നും ഹിന്ദുസ്ഥാന്‍ ടൈംസ് റിപോര്‍ട്ട് ചെയ്തു. ഭരണഘടനാ ഭേദഗതി പ്രകാരം ജില്ലാ കൗണ്‍സിലുകള്‍ക്ക് കൂടുതല്‍ സ്വയംഭരണാധികാരവും കേന്ദ്ര ഫണ്ട് നേരിട്ട് ലഭ്യമാവുന്നതുമാണ് കോണ്‍ഗ്രസ് അംഗങ്ങളെ ബിജെപിയില്‍ ചേരാന്‍ പ്രേരിപ്പിച്ചതെന്ന് കോണ്‍ഗ്രസ് നേതാവായിരുന്ന സകായി പറഞ്ഞു. ബിജെപി-കോണ്‍ഗ്രസ് ബന്ധമില്ലാത്ത പ്രാദേശിക പാര്‍ട്ടിയായ മിസോ നാഷനല്‍ ഫ്രണ്ടാണ് മിസോറാം ഭരിക്കുന്നത്.