ക്യാമറയുള്ള കണ്ണട ധരിച്ച് പോളിങ് ബൂത്തിലെത്തിയ യുഡിഎഫ് ഏജന്റ് പിടിയില്‍

കാസര്‍കോട്: ഉദുമയില്‍ ക്യാമറയുള്ള കണ്ണട ധരിച്ച് പോളിങ് ബൂത്തിലെത്തിയ യുഡിഎഫ് സ്ഥാനാര്‍ഥിയുടെ ചീഫ് ഇലക്ഷന്‍ ഏജന്റ് പിടിയില്‍. ഉദുമ മണ്ഡലത്തിലെ യുഡിഎഫ് സ്ഥാനാര്‍ഥി കെ നീലകണ്ഠന്റെ ചീഫ് ഇലക്ഷന്‍ ഏജന്റും അഭിഭാഷകനുമായ ബി എം ജമാലിനെയാണ് സിഐയുടെ നേതൃത്വത്തില്‍ പിടികൂടിയത്. ബേക്കല്‍ ഇസ് ലാമിക് എഎല്‍പി സ്‌കൂളിലെ 165ാം നമ്പര്‍ പോളിങ് ബൂത്തിലാണ് സംഭവം. ഇതേത്തുടര്‍ന്ന് പ്രിസൈഡിങ് ഓഫീസറും പോലിസും ഇടപെട്ട് കണ്ണട പിടിച്ചെടുക്കുകയായിരുന്നു. അറസ്റ്റ് ഉള്‍പ്പെടെയുള്ള മറ്റു നടപടികള്‍ പിന്നീടുണ്ടാകുമെന്നും പോലിസ് അറിയിച്ചു.

തിരഞ്ഞെടുപ്പ് ചട്ടങ്ങളുടെ ലംഘനമായതിനാല്‍ വിഷയത്തില്‍ കൂടുതല്‍ പരിശോധനകള്‍ നടന്നുവരികയാണ്. ഇന്ന് രാവിലെയാണ് സംഭവം. ജമാല്‍ ധരിച്ച കണ്ണടയില്‍ ക്യാമറയുണ്ടെന്ന് ശ്രദ്ധയില്‍പ്പെട്ട എല്‍ഡിഎഫ് പ്രവര്‍ത്തകര്‍ പ്രതിഷേധവുമായി രംഗത്തെത്തി. എന്നാല്‍ താന്‍ സ്ഥിരമായി ഉപയോഗിക്കുന്ന കണ്ണടയാണിതെന്നും ഇതില്‍ ക്യാമറയുള്ള കാര്യം ശ്രദ്ധയില്‍പ്പെട്ടിരുന്നില്ലെന്നുമാണ് ബി എം ജമാലിന്റെ വിശദീകരണം.