പഞ്ചാബില്‍ മൂന്നുനില കെട്ടിടം തകര്‍ന്നുവീണു; നിരവധി പേര്‍ കുടുങ്ങിയതായി സംശയം

ചണ്ഡിഗഡ്: പഞ്ചാബിലെ മൊഹാലിയില്‍ മൂന്നുനില കെട്ടിടം തകര്‍ന്നുവീണു. ഖറാര്‍ലാന്‍ഡ്രന്‍ റോഡില്‍ ശനിയാഴ്ച ഉച്ചയ്ക്കുശേഷമായിരുന്നു സംഭവം. നിരവധി പേര്‍ കെട്ടിട അവശിഷ്ടങ്ങള്‍ക്കുള്ളില്‍ കുടുങ്ങിക്കിടക്കുന്നതായി സംശയിക്കുന്നുണ്ട്. രണ്ടുപേരെ രക്ഷപ്പെടുത്തി. ഏഴോളം പേര്‍ ഇനിയും കുടുങ്ങിക്കിടപ്പുണ്ടെന്നാണ് കരുതുന്നതെന്ന് പോലിസ് പറഞ്ഞു.

കെട്ടിടത്തിന്റെ അടിത്തറയില്‍ ജെസിബി ഉപയോഗിച്ച് കുഴിയെടുക്കുന്നതിനിടെയാണ് അപകടം സംഭവിച്ചത്. പ്രദേശത്ത് രക്ഷാപ്രവര്‍ത്തനം പുരോഗമിക്കുകയാണ്. ദേശീയ ദുരന്ത പ്രതികരണസേന (എന്‍ഡിആര്‍എഫ്) യെ വിവരം അറിയിച്ചതായും ഉടന്‍ സ്ഥലത്തെത്തുമെന്നും പോലിസ് അറിയിച്ചു. മൊഹാലി സബ് ഡിവിഷനല്‍ മജിസ്‌ട്രേറ്റ് ഉള്‍പ്പടെയുള്ളവര്‍ സ്ഥലത്ത് ക്യാംപ് ചെയ്യുന്നുണ്ട്.