മതന്യൂനപക്ഷങ്ങള്‍ക്കെതിരായ ആക്രമണം; ഡിസംബര്‍ ഒന്നിന് പ്രതിഷേധദിനം ആചരിക്കുമെന്ന് സിപിഎം

ന്യൂഡല്‍ഹി: രാജ്യത്തെ മതന്യൂനപക്ഷങ്ങള്‍ക്കും അവരുടെ ഭരണഘടനാപരമായ അവകാശങ്ങള്‍ക്കും നേരേ ആക്രമണങ്ങള്‍ തുടരുന്ന സാഹചര്യത്തില്‍ ഡിസംബര്‍ ഒന്നിന് പ്രതിഷേധദിനം ആചരിക്കാന്‍ പാര്‍ട്ടിയുടെ എല്ലാ ഘടകങ്ങളോടും സിപിഎം പൊളിറ്റ് ബ്യൂറോ ആഹ്വാനം ചെയ്തു. സംഘപരിവാര്‍ അനുബന്ധ സംഘടനകള്‍ മുസ്‌ലിം, ക്രൈസ്തവ വിഭാഗങ്ങള്‍ക്കെതിരേ നടത്തുന്ന ആക്രമണങ്ങള്‍ വര്‍ധിക്കുന്നത് അങ്ങേയറ്റം ആശങ്കാജനകമാണ്.

ആക്രമണങ്ങള്‍ ഇളക്കിവിടുന്ന വിധത്തില്‍ ബിജെപി നേതാക്കള്‍ വര്‍ഗീയസന്ദേശങ്ങള്‍ പ്രചരിപ്പിക്കുന്നത് എങ്ങനെയെന്ന് ഫെയ്‌സ്ബുക്കിന്റെ ഈയിടെ പുറത്തുവന്ന ആഭ്യന്തരരേഖകള്‍ വ്യക്തമാക്കി. ഇത്തരം വര്‍ഗീയപ്രവര്‍ത്തനങ്ങളില്‍ കുറ്റവാളികള്‍ നിയമത്തിന്റെ വലയില്‍ പെടുന്നില്ല. മാത്രമല്ല, ബിജെപി ഭരിക്കുന്ന സംസ്ഥാനങ്ങളില്‍ ഇരകളെ സര്‍ക്കാര്‍ ശിക്ഷിക്കുകയും ചെയ്യുന്നു- പിബി ചൂണ്ടിക്കാട്ടി.