76-കാരിയെ ബലാത്സംഗം ചെയ്ത സംഭവം: ​27-കാരൻ മുമ്പും വയോധികയെ പീഡിപ്പിക്കാൻ ശ്രമിച്ച കേസിൽ പ്രതി

ഓച്ചിറ(കൊല്ലം): ഒറ്റയ്ക്കു താമസിക്കുന്ന എഴുപത്താറുകാരിയെ വീട്ടില്‍ക്കയറി ക്രൂരമായി ബലാത്സംഗം ചെയ്ത കേസില്‍ യുവാവിനെ പോലിസ് അറസ്റ്റ് ചെയ്തു. ക്ലാപ്പനയില്‍ താമസിച്ചിരുന്ന ഷഹാസിനെ(27)യാണ് കായംകുളം പോലിസ് അറസ്റ്റ് ചെയ്തത്.

തിങ്കളാഴ്ച രാത്രി എട്ടുമണിയോടെയാണ് സംഭവം. വീടിനുസമീപം ഒളിച്ചിരുന്ന പ്രതി, വയോധിക വാതില്‍ തുറന്നപ്പോള്‍ ഓടി അകത്തുകയറിയാണ് ഉപദ്രവിച്ചതെന്ന് പോലിസ് പറഞ്ഞു. ഗുരുതരമായി പരിക്കേറ്റ വയോധികയെ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ അടിയന്തര ശസ്ത്രക്രിയയ്ക്കു വിധേയയാക്കി. കൃഷ്ണപുരം അതിര്‍ത്തിയിലെ ചിറയ്ക്കടുത്ത് ഒളിച്ചിരുന്ന പ്രതിയെ പോലിസ് പിടികൂടുകയായിരുന്നു.രണ്ടാഴ്ചമുമ്പ് പുലര്‍ച്ചെ ഓച്ചിറ സ്വദേശിയായ വയോധികയെ പീഡിപ്പിക്കാന്‍ ശ്രമിച്ച കേസിലും ഇയാള്‍ പ്രതിയാണെന്നു പോലിസ് പറഞ്ഞു. ഇതുമായി ബന്ധപ്പെട്ട് അന്വേഷണം നടന്നുവരികയായിരുന്നു.മുമ്പ് ഒന്നരക്കിലോഗ്രാം കഞ്ചാവുമായി കരുനാഗപ്പള്ളി എക്‌സൈസിന്റെ പിടിയിലായ ഷഹാസ് നാലുവര്‍ഷത്തെ ജയില്‍ശിക്ഷ അനുഭവിച്ചിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.