ശ്രീലങ്കയില്‍ മോശം കാലാവസ്ഥ; രണ്ട് അന്താരാഷ്ട്ര വിമാനങ്ങള്‍ തിരുവനന്തപുരം വിമാനത്താവളത്തിലേക്ക് തിരിച്ചുവിട്ടു

തിരുവനന്തപുരം: ശ്രീലങ്കയിലെ മോശം കാലാവസ്ഥയെ തുടര്‍ന്ന് കൊളംബോ ലക്ഷ്യമാക്കി മിഡില്‍ ഈസ്റ്റില്‍ നിന്നും പുറപ്പെട്ട രണ്ട് അന്താരാഷ്ട്ര വിമാനങ്ങള്‍ തിരുവനന്തപുരം അന്താരാഷ്ട്ര വിമാനത്താവളത്തിലേക്ക് അടിയന്തരമായി വഴിതിരിച്ചുവിട്ടു. ഇന്ന് രാവിലെയായിരുന്നു സംഭവം.

ഇസ്താംബൂളില്‍ നിന്നുള്ള തുര്‍ക്കി എയര്‍ലൈന്‍സ് വിമാനവും സൗദി അറേബ്യയിലെ ദമ്മാമില്‍ നിന്നുള്ള ശ്രീലങ്കന്‍ എയര്‍ലൈന്‍സ് വിമാനവുമാണ് തിരുവനന്തപുരം വിമാനത്താവളത്തില്‍ ലാന്‍ഡ് ചെയ്തത്. തുര്‍ക്കി എയര്‍ലൈന്‍സ് വിമാനത്തില്‍ 258 യാത്രക്കാരും 10 ജീവനക്കാരുമുണ്ടായിരുന്നു. ശ്രീലങ്കന്‍ എയര്‍ലൈന്‍സ് വിമാനത്തില്‍ ജീവനക്കാരടക്കം 188 പേരാണ് ഉണ്ടായിരുന്നത്.

രണ്ടു വിമാനങ്ങളും രാവിലെ ഏഴു മണിയോടെ സുരക്ഷിതമായി തിരുവനന്തപുരത്ത് ഇറങ്ങിയതായി വിമാനത്താവളം അധികൃതര്‍ അറിയിച്ചു. പിന്നീട് കാലാവസ്ഥ മെച്ചപ്പെട്ടതോടെ തുര്‍ക്കി എയര്‍ലൈന്‍സ് വിമാനം രാവിലെ 8.38നും ശ്രീലങ്കന്‍ എയര്‍ലൈന്‍സ് വിമാനം 8.48നും കൊളംബോയിലേക്ക് പുറപ്പെട്ടതായി ടിയാല്‍ അറിയിച്ചു.