കാട്ടാന ആക്രമണം; രണ്ടു പേര്‍ക്ക് പരിക്ക്

കോതമംഗലം: എറണാകുളം കോട്ടപ്പടിയില്‍ കാട്ടാന ആക്രമണത്തില്‍ രണ്ടു പേര്‍ക്ക് പരിക്കേറ്റു. കോതമംഗലം കുളങ്ങാട്ടുകുഴി സ്വദേശികളായ ഗോപി, അയ്യപ്പന്‍കുട്ടി എന്നിവര്‍ക്കാണ് പരിക്കേറ്റത്. ഇന്ന് രാവിലെ ഏഴു മണിയാടെ കോട്ടപ്പടിക്കടുത്തുള്ള വാവേലിയില്‍ ബൈക്കില്‍ സഞ്ചരിക്കുമ്പോഴാണ് സംഭവം.

ഇരുവരും അബദ്ധത്തില്‍ കാട്ടാനയുടെ മുന്നില്‍പ്പെടുകയായിരുന്നു. കാട്ടാന തുമ്പിക്കൈ കൊണ്ട് ആക്രമിച്ചെങ്കിലും ഗോപിയും അയ്യപ്പന്‍കുട്ടിയും വാഹനം ഉപേക്ഷിച്ച് ഓടി രക്ഷപ്പെട്ടു. തുടര്‍ന്ന് നാട്ടുകാര്‍ ഇവരെ സമീപത്തെ സര്‍ക്കാര്‍ ആശുപത്രിയില്‍ പ്രവേശിപ്പിച്ചു. ഇരുവരുടേയും പരിക്ക് ഗുരുതരമെല്ലെന്നും നില തൃപ്തികരമാണെന്നും പോലിസ് അറിയിച്ചു. വനം ഉദ്യോഗസ്ഥര്‍ സ്ഥലത്തെത്തി ആനയെ തുരത്താനുള്ള നടപടികള്‍ സ്വീകരിച്ചുവരികയാണ്.