നിരോധനം ലംഘിച്ച് ബംഗാളില്‍ തൃണമൂല്‍ പ്രവര്‍ത്തകരുടെ ആഹ്ലാദപ്രകടനം
കൊല്‍ക്കത്ത: കൊവിഡ് വ്യാപനത്തിന്റെ പശ്ചാത്തലത്തില്‍ ആഹ്ലാദപ്രകടനങ്ങള്‍ പാടില്ലെന്ന നിര്‍ദേശമുണ്ടായിട്ടും തൃണമൂല്‍ പ്രവര്‍ത്തകര്‍ ലംഘിച്ചു. നേരത്തെ ഡിഎംകെ പ്രവര്‍ത്തകരും കൊവിഡ് നിര്‍ദേശങ്ങള്‍ ലംഘിച്ച് ചെന്നൈയില്‍ ആഹ്ലാദപ്രകടനം നടത്തിയിരുന്നു.
കൊല്‍ക്കത്തയിലെ കാളിഘട്ടില്‍ തടിച്ചുകൂടിയ നൂറുകണക്കിന് തൃണമൂല്‍ പ്രവര്‍ത്തകര്‍ വലിയ ആഘോഷപരിപാടികളാണ് സംഘടിപ്പിച്ചത്. കാളിഘട്ടിനു പുറമെ അസനൊളിലും പരിപാടികള്‍ നടന്നു. അവിടെയും നിരവധി പേര്‍ പങ്കെടുത്തു.
ഡിഎംകെ പ്രവര്‍ത്തകര്‍ ചെന്നൈയിലെ ഡിഎംകെ ആസ്ഥാനത്തിനു വെളിയിലാണ് ആഘോഷപരിപാടികള്‍ സംഘടിപ്പിച്ചത്.
ആഘോഷങ്ങള്‍ നടക്കുന്ന സാഹചര്യത്തില്‍ തിരഞ്ഞെടുപ്പ് കമ്മീഷന്‍ കടുത്ത നടപടികളിലേക്ക് കടക്കാന്‍ തീരുമാനിച്ചു. ആഘോഷങ്ങള്‍ നടക്കുന്ന പ്രദേശങ്ങളിലെ സ്റ്റേഷന്‍ ഹൗസ് ഉദ്യോഗസ്ഥരെ സസ്‌പെന്‍ഡ് ചെയ്യാനും അവര്‍ക്കെതിരേ ക്രിമിനല്‍ കേസെടുക്കാനുമാണ് നിര്‍ദേശം.
