മുത്തങ്ങയില്‍ യുവാവിനെ ആക്രമിച്ച പുലിയെ മയക്ക് വെടിവെച്ച് പിടികൂടി; പൂതാടിയിലെ പുലി തന്നെയെന്ന് നാട്ടുകാര്‍; നിഷേധിച്ച് വനംവകുപ്പ്

കല്‍പറ്റ: മുത്തങ്ങ പൊന്‍കുഴി കോളനിയില്‍ യുവാവിനെ ആക്രമിച്ച പുലിയെ വനം വകുപ്പ് മയക്കുവെടി വച്ച് പിടികൂടി. മുത്തങ്ങ പൊന്‍കുഴി പണിയ കോളനിയിലെ വിനീഷ് (29)നാണ് വെള്ളിയാഴ്ച രാത്രി ഏഴു മണിയോടെ പുലിയുടെ ആക്രമണത്തില്‍ പരിക്കേറ്റത്. വിനീഷിനെ ബത്തേരി താലൂക്ക് ആശുപത്രിയില്‍ പ്രവേശിപ്പിച്ചു. തുടര്‍ന്ന് വിവരമറിഞ്ഞെത്തിയ വനം വകുപ്പ് ഇന്ന് രാവിലെ ഏഴു മണിയോടെ പുലിയെ മയക്കുവെടിവച്ചു പിടികൂടുകയായിരുന്നു.

വെള്ളിയാഴ്ച രാത്രി ഏഴോടെയാണ് പുലിയെ കോളനിയില്‍ കണ്ടത്. ഇതിനിടയിലാണ് പുലിയുടെ ആക്രമണം ഉണ്ടായത്. കൂടാതെ ഒരു നായയെയും ആടിനെയും പുലി ആക്രമിച്ചതായും നാട്ടുകാര്‍ പറഞ്ഞു. കഴിഞ്ഞ ദിവസം പൂതാടിയില്‍ നിന്നും മയക്കുവെടി വച്ച് പിടികൂടിയതിനു ശേഷം മുത്തങ്ങയിലെത്തിച്ച് തുറന്നു വിട്ട പുലിയാണ് മുത്തങ്ങ പൊന്‍കുഴി പണിയ കോളനിയിലും ഇറങ്ങിയതെന്നാണ് ആരോപണം. മയക്കുവെടി വച്ച് പിടികൂടിയ പുലിയെ ബത്തേരി വൈല്‍ഡ് ലൈഫ് വാര്‍ഡന്‍ ഓഫിസിലേക്ക് മാറ്റി.ഇതിന് മുമ്പും ഒരു സ്ഥലത്ത് നിന്ന് പിടി കൂടുന്ന പുലിയെ മറ്റൊരു സ്ഥലത്ത് തുറന്നു വിടുന്നതായി നാട്ടുകാരുടെ പരാതി ഉണ്ടായിരുന്നു. എന്നാല്‍ വനം വകുപ്പ് അധികൃതര്‍ ഇത് നിഷേധിച്ചു.