ശുഹൈബ് വധക്കേസ് പ്രതിയുടെ സഹോദരിക്ക് കോണ്‍ഗ്രസ് ഭരിക്കുന്ന ആശുപത്രിയില്‍ ജോലി; ശുപാര്‍ശക്കത്തു നല്‍കിയ കോണ്‍ഗ്രസ് നേതാവിനെ പുറത്താക്കണമെന്ന് യൂത്ത് കോണ്‍ഗ്രസ്

തലശേരി: ശുഹൈബ് വധക്കേസിലെ പ്രതിയുടെ സഹോദരിക്ക് കോണ്‍ഗ്രസ് ഭരണത്തിനു കീഴിലുള്ള തലശേരി ഇന്ദിരാഗാന്ധി ആശുപത്രിയില്‍ ജോലി നല്‍കിയതിനെചൊല്ലി പാര്‍ട്ടിക്കുള്ളില്‍ വിവാദം പുകയുന്നു. കാക്കയങ്ങാട് സ്വദേശിയായ ശുഹൈബ് വധക്കേസിലെ നാലാം പ്രതിയുടെ സഹോദരിക്കാണ് ഇന്ദിരാഗാന്ധി ആശുപത്രിയില്‍ നേഴ്‌സായി ജോലി നല്‍കിയത്.

ശുഹൈബിനെ സിപിഎമ്മിന്റെ അക്രമരാഷ്ട്രീയത്തിന്റെ ഇരയായി ഉയര്‍ത്തിക്കാട്ടുന്ന കോണ്‍ഗ്രസ് നേതൃത്വം തന്നെ പ്രതിയുടെ അടുത്ത ബന്ധുവിന് ജോലി നല്‍കിയതാണ് വിവാദമായിരിക്കുന്നത്. കോണ്‍ഗ്രസ് കണിച്ചാര്‍ മണ്ഡലം മുന്‍ പ്രസിഡന്റ് തൈക്കുന്നേല്‍ ചാക്കോയുടെ ശുപാര്‍ശയിലാണ് ജോലി നല്‍കിയതെന്നാണ് ഔദ്യോഗിക വിശദീകരണം. ഏത് ശുപാര്‍ശയുടെ പേരിലായാലും ശുഹൈബിന്റെ കൊലയാളികളെ സഹായിക്കുന്ന നിലപാട് പാടില്ലെന്നും ശുഹൈബിന്റെ ആത്മാവ് പോലും പൊറുക്കാത്ത കാര്യമാണ് കോണ്‍ഗ്രസ് നേതൃത്വം ചെയ്തതെന്നുമാണ് പ്രവര്‍ത്തകരുടെ അഭിപ്രായം.

സംഭവത്തില്‍ രൂക്ഷമായ പ്രതികരണവുമായി കോണ്‍ഗ്രസ് പ്രവര്‍ത്തകര്‍ രംഗത്തെത്തി. ജോലിക്ക് ശുപാര്‍ശ നല്‍കിയ ചാക്കോ തൈക്കുന്നേലിനെ പാര്‍ട്ടിയില്‍ നിന്ന് പുറത്താക്കണമെന്ന് യൂത്ത് കോണ്‍ഗ്രസ്സ് പേരാവൂര്‍ നിയോജക മണ്ഡലം കമ്മിറ്റി മുന്‍ ഭാരവാഹികളായ എം.അജേഷ്, ശരത്ചന്ദ്രന്‍, സുമേഷ് കുമാര്‍, നമേഷ് കുമാര്‍, ജാന്‍സണ്‍, ഷാഹിദ് പുന്നാട് എന്നിവര്‍ ആവശ്യപ്പെട്ടു