ടേക്ക് ഓഫിന് തൊട്ടുമുമ്പ് വിമാനത്തില്‍ നിന്ന് പുകയും ദുര്‍ഗന്ധവും; യാത്രക്കാരെ പുറത്തിറക്കി

തിരുവനന്തപുരം: തിരുവനന്തപുരം വിമാനത്താവളത്തില്‍ റണ്‍വേയില്‍ നിന്ന് പുറപ്പെടാന്‍ ഒരുങ്ങുന്നതിനിടെ എയര്‍ ഇന്ത്യ വിമാനത്തില്‍ നിന്ന് പുകയും ദുര്‍ഗന്ധവും ഉയര്‍ന്നു. 142 യാത്രക്കാരെയും സുരക്ഷിതരായി പുറത്തിറക്കി. രാവിലെ എട്ട് മണിക്ക് മസ്‌കറ്റിലേക്ക് പുറപ്പെടേണ്ടിയിരുന്ന വിമാനത്തിലാണ് സംഭവം.

ടേക്ക് ഓഫിന് തൊട്ടുമുമ്പായിരുന്നു വിമാനത്തില്‍ നിന്നും പുക ഉയര്‍ന്നത്. ഇതോടെ യാത്രക്കാര്‍ വിമാനത്തിനുള്ളില്‍ നിന്ന് നിലവിളിക്കുകയായിരുന്നു. വിമാനത്തിനകത്ത് എന്തൊക്കെയോ കത്തുന്നതിന്റെ ദുര്‍ഗന്ധവുമുണ്ടായിരുന്നതായി യാത്രക്കാര്‍ പറഞ്ഞു. ഇതോടെയാണ് വിമാനം അടിയന്തിരമായി തിരിച്ചിറക്കിയത്. പുക ഉണ്ടാകാനുള്ള കാരണം വ്യക്തമല്ല. പ്രശ്‌നം പരിഹരിച്ച ശേഷം ഇതേ വിമാനത്തില്‍ തന്നെ യാത്ര ചെയ്യാനാകുമെന്നാണ് അധികൃതര്‍ അറിയിച്ചത്.