പ്രീമിയര്‍ ലീഗ്; സിറ്റിക്ക് തകര്‍പ്പന്‍ ജയം; ലിവര്‍പൂളിനെ സമനിലയില്‍ പിടിച്ച് ബ്രിങ്ടണ്‍

ഇത്തിഹാദ്: ഇംഗ്ലിഷ് പ്രീമിയര്‍ ലീഗില്‍ തകര്‍പ്പന്‍ ജയവുമായി മാഞ്ചസ്റ്റര്‍ സിറ്റി. ബേണ്‍ലിയെ എതിരില്ലാത്ത അഞ്ച് ഗോളിനാണ് സിറ്റി തോല്‍പ്പിച്ചത്. റിയാദ് മെഹറസിന്റെ ഹാട്രിക്കാണ് സിറ്റിയെ വന്‍ ജയത്തിലേക്ക് നയിച്ചത്. അള്‍ജീരിയന്‍ താരത്തിന്റെ സിറ്റിയ്ക്കായുള്ള ആദ്യ ഹാട്രിക്കാണിത്. മെന്‍ഡി, ടോറസ് എന്നിവരാണ് മറ്റ് സ്‌കോറര്‍മാര്‍. ഈ ജയത്തോടെ സിറ്റിയുടെ ദീര്‍ഘകാലമായുള്ള ഗോള്‍ വരള്‍ച്ച അവസാനിച്ചു. സിറ്റി ലീഗില്‍ എട്ടാം സ്ഥാനത്താണ്. മറ്റൊരു മല്‍സരത്തില്‍ ഒന്നാം സ്ഥാനക്കാരായ ലിവര്‍പൂളിനെ ബ്രിങ്ടണ്‍ 1-1 സമനിലയില്‍ കുരുക്കി. സൂപ്പര്‍ താരം ജോട്ടയിലൂടെ 60ാം മിനിറ്റില്‍ ലിവര്‍പൂളാണ് ലീഡെടുത്തത്. എന്നാല്‍ ഇഞ്ചുറി ടൈമില്‍ ഗ്രോബിലൂടെ ബ്രിങ്ടണ്‍ സമനില പിടിക്കുകയായിരുന്നു.

ജര്‍മ്മന്‍ ബുണ്ടസ ലീഗില്‍ ബയേണ്‍ മ്യൂണിക്ക് സ്റ്റുഗര്‍ട്ടിനെ 3-1ന് തോല്‍പ്പിച്ചു. മറ്റൊരു മല്‍സരത്തില്‍ കരുത്തരായ ഡോര്‍ട്ട്മുണ്ടിനെ 2-1ന് കൊളോണ്‍ തോല്‍പ്പിച്ചു. 18 മല്‍സരങ്ങള്‍ക്ക് ശേഷമുള്ള കൊളോണ്‍ എഫ് സിയുടെ ആദ്യ ജയമാണിത്.