ബസ് അപകടത്തില്‍ വയോധികന്‍ മരിച്ചു; പിന്‍ചക്രം തലയിലൂടെ കയറിയെന്ന് പോലിസ്

കോട്ടയം: റോഡ് മുറിച്ചുകടക്കുന്നതിനിടെ സ്‌കൂള്‍ ബസിടിച്ച് വയോധികന്‍ മരിച്ചു. കോട്ടയം ഭരണങ്ങാനം മറ്റത്തില്‍ ഭൂമിരാജാണ് (80) മരിച്ചത്. ഇന്ന് വൈകിട്ട് നാലോടെ ഭരണങ്ങാനം ടൗണില്‍ നിന്ന് ചൂണ്ടച്ചേരിയിലേയ്ക്ക് തിരിയുന്ന ജങ്ഷനിലാണ് അപകടം നടന്നത്. തൊട്ടടുത്ത ഹോട്ടലില്‍ നിന്ന് ചായ കുടിച്ച് ശേഷം റോഡ് മുറിച്ചു കടക്കുമ്പോഴായിരുന്നു അപകടം.

ബസിടിച്ച് നിലത്തുവീണ ഭൂമി രാജിന്റെ തലയിലൂടെ ബസിന്റെ പിന്‍ചിക്രം കയറി ഇറങ്ങിയതായി പോലിസ് പറഞ്ഞു. ഭൂമിരാജ് തല്‍ക്ഷണം മരിച്ചു. ചൂണ്ടച്ചേരി സാന്‍ജോസ് പബ്ലിക് സ്‌കൂളിലെ വിദ്യാര്‍ഥികളുമായി പോയ ബസാണ് അപകടമുണ്ടാക്കിയതെന്ന് പോലിസ് പറഞ്ഞു. തമിഴ്‌നാട് സ്വദേശിയായ ഭൂമിരാജും കുടുംബവും 50 വര്‍ഷത്തോളമായി ഭരണങ്ങാനത്താണ് താമസം. ഭാര്യ: പരേതയായ അഴകമ്മ. മക്കള്‍: ശെല്‍വരാജ്, ദുരൈരാജ്, രാസാത്തി, നാഗരാജ്, പരേതയായ ജ്യോതി സംസ്‌കാരം പിന്നീട്.