അതിഥി തൊഴിലാളികളുടെ ക്ഷേമം ഉറപ്പാക്കും

മലപ്പുറം: അതിഥി തൊഴിലാളികളുടെ സുരക്ഷയും ക്ഷേമവും ഓരോ തദ്ദേശ സ്വയംഭരണ സ്ഥാപനങ്ങളും ഉറപ്പാക്കണമെന്ന് മന്ത്രി ഡോ. കെ.ടി. ജലീല്‍. തൊഴിലില്ലാതെ വിഷമിക്കുന്ന അതിഥി തൊഴിലാളികള്‍ക്കും കുടുംബങ്ങള്‍ക്കും ആവശ്യമായ ഭക്ഷണസാധനങ്ങള്‍ കിറ്റുകളാക്കി വിതരണം ചെയ്യാം. കൂടുതല്‍ സാധനങ്ങള്‍ സിവില്‍ സപ്ലൈസില്‍ നിന്നും കണ്‍സ്യുമര്‍ ഫെഡില്‍ നിന്നും വാങ്ങി സന്നദ്ധ പ്രവര്‍ത്തകരെ ഉപയോഗിച്ചു കിറ്റുകളാക്കാവുന്ന രീതി ഉപയോഗപ്പെടുത്താം. എന്നാല്‍ സ്‌പോണ്‍സര്‍മാരുടെ സംരക്ഷണയിലുള്ള തൊഴിലാളികളുടെ ഭക്ഷണലഭ്യത ഉറപ്പാക്കേണ്ടത് സ്‌പോണ്‍സര്‍മാരുടെ ഉത്തരവാദിത്തമാണ്. അതിഥി തൊഴിലാളികളെ താമസ സ്ഥലത്തു നിന്നും ഇറക്കിവിടുന്ന സാഹചര്യം അനുവദിക്കില്ല. ഇങ്ങനെയുണ്ടായാല്‍ തദ്ദേശ സ്വയംഭരണ സ്ഥാപന അധ്യക്ഷര്‍ കെട്ടിട ഉടമകളുമായി ബന്ധപ്പെട്ട് കാര്യങ്ങള്‍ ബോധ്യപ്പെടുത്തണം. ആവശ്യമെങ്കില്‍ പൊലീസിന്റെ സഹായവും ഉറപ്പാക്കാം.