എന്‍സിപിയും ബിജെപിയും നദിയുടെ രണ്ടറ്റങ്ങള്‍; സഖ്യസാധ്യത തള്ളി എന്‍സിപി നേതാവ് നവാബ് മാലിക്

മുംബൈ: എന്‍സിപിയും ബിജെപിയും രണ്ടറ്റം കൂട്ടിമുട്ടാത്ത രണ്ട് നദിപോലെയാണെന്നും പ്രത്യയശാസ്ത്രപരമായി യോജിക്കാനാവില്ലെന്നും എന്‍സിപി നേതാവ് നവാബ് മാലിക്ക്. രണ്ട് പാര്‍ട്ടികളും തമ്മില്‍ ഐക്യത്തിനുള്ള ശ്രമം നടക്കുന്നുണ്ടെന്ന പ്രചാരണം നാവാബ് മാലിക് തള്ളി. എന്‍സിപി മേധാവി ശരത് പവാറും പ്രധാനമന്ത്രി നരേന്ദ്ര മോദിയും തമ്മില്‍ ഡല്‍ഹിയില്‍ വച്ച് കൂടിക്കാഴ്ച നടന്നതോടെയാണ് എന്‍സിപിയും ബിജെപിയും തമ്മില്‍ സഖ്യത്തിനുള്ള ശ്രമം നടക്കുന്നുണ്ടെന്ന പ്രചാരണം ശക്തമായത്. മഹാരാഷ്ട്രയിലെ മഹാ വികാസ് അഘാഡിയില്‍ നിന്ന് എന്‍സിപി വിട്ടുപോകുന്നതിന്റെ ഭാഗമായി മഹാരാഷ്ട്രയിലെ പ്രതിപക്ഷ നേതാവ് ഫ്ടാനാവിസുമായി കൂടിക്കാഴ്ച നടത്തിയെന്നും മറ്റൊരു വാര്‍ത്ത പുറത്തുവന്നിരുന്നു. ഇതും നവാബ് നിഷേധിച്ചു.

ശരത് പവാറും പ്രധാനമന്ത്രിയും തമ്മില്‍ ബാങ്കിങ് നിയമത്തെക്കുറിച്ചാണ് ചര്‍ച്ച നടത്തിയതെന്ന് നവാബ് പറഞ്ഞു. ഡല്‍ഹിയില്‍ വച്ച് സംസ്ഥാന ബിജെപി നേതാക്കളുമായി പവാര്‍ കണ്ടിരുന്നെന്ന വാര്‍ത്തയും നവാബ് നിഷേധിച്ചു.

അതേസമയം പ്രതിരോധ മന്ത്രി രാജ്‌നാഥ് സിങ്ങുമായി പവാര്‍ കൂടിക്കാഴ്ച നടത്തിയെന്ന് നവാബ് പറഞ്ഞു. അതിര്‍ത്തി കടന്ന തീവ്രവാദത്തെക്കുറിച്ചുള്ള അനുഭവങ്ങള്‍ പങ്കുവക്കാനായിരുന്നു കൂടിക്കാഴ്ചയെന്ന് അദ്ദേഹം പറഞ്ഞു.