നിങ്ങള്‍ക്ക് വേദനയുണ്ടെന്ന് എനിക്കറിയാം, ആശങ്ക വേണ്ട; ബംഗാളില്‍ വഖ്ഫ് നിയമം നടപ്പാക്കില്ല: മമത ബാനര്‍ജി

കൊല്‍ക്കത്ത: വഖ്ഫ് ഭേദഗതി നിയമം ബംഗാളില്‍ നടപ്പാക്കില്ലെന്ന് മുഖ്യമന്ത്രി മമത ബാനര്‍ജി. ജൈന സമൂഹം സംഘടിപ്പിച്ച പരിപാടിയില്‍ സംസാരിക്കവെയാണ് മമതയുടെ ഉറപ്പ്. 'വഖ്ഫ് ഭേദഗതി നിയമം നിങ്ങളെ വേദനിപ്പിച്ചിട്ടുണ്ടെന്ന് എനിക്കറിയാം, പക്ഷേ ബംഗാളില്‍ വിഭജിക്കുകയും ഭരിക്കുകയും ചെയ്യുന്ന തരത്തിലുള്ള ഒന്നും സംഭവിക്കില്ല,' മമത പറഞ്ഞു. 33 ശതമാനം മുസ്‌ലിംകള്‍ ഇവിടെ താമസിക്കുന്നുണ്ടെന്നും അവര്‍ നൂറ്റാണ്ടുകളായി ഇവിടെ താമസിക്കുന്നവരാണെന്നും അവരെ സംരക്ഷിക്കേണ്ടത് തന്റെ കടമയാണെന്നും മമത ബാനര്‍ജി പറഞ്ഞു.

'ജൈന സമൂഹം എന്നെ ക്ഷണിച്ചാല്‍ ഞാന്‍ പങ്കെടുക്കില്ലേ? ഞാന്‍ പങ്കെടുക്കും. ഇവിടെ ഹിന്ദുക്കളെ ആരാണ് സംരക്ഷിക്കുന്നത്? ഇതാണ് നിങ്ങളുടെയും വീട്. ജീവിക്കുക, ജീവിക്കാന്‍ അനുവദിക്കുക എന്നതില്‍ ഞങ്ങള്‍ വിശ്വസിക്കുന്നു,' മമത കൂട്ടിചേര്‍ത്തു. വിഷമിക്കേണ്ട, ദീദി ഇവിടെയുണ്ട്. ദീദി നിങ്ങളെയും നിങ്ങളുടെ സ്വത്തുക്കളെയും സംരക്ഷിക്കുമെന്നും മമത പറഞ്ഞു. ബംഗാളിലെ മുസ്‌ലിംകള്‍ ആശങ്കപ്പെടേണ്ടതില്ലെന്നും അവര്‍ വ്യക്തമാക്കി.