തദ്ദേശ തിരഞ്ഞെടുപ്പ്; എസ്ഡിപിഐ മികച്ച മുന്നേറ്റമുണ്ടാക്കി: സിപിഎ ലത്തീഫ്

കോഴിക്കോട്: പാര്‍ട്ടിക്കെതിരേ നിരന്തരം ഭരണകൂട വേട്ട തുടരുമ്പോഴും എല്ലാ പ്രതിസന്ധികളെയും അതിജീവിച്ച് തിരഞ്ഞെടുപ്പില്‍ മികച്ച പ്രകടനം കാഴ്ചവെക്കാന്‍ കഴിഞ്ഞതായി എസ്ഡിപിഐ സംസ്ഥാന പ്രസിഡന്റ് സിപിഎ ലത്തീഫ് വാര്‍ത്താ സമ്മേളനത്തില്‍ പറഞ്ഞു. രണ്ട് കോര്‍പ്പറേഷനിലും ഒരു ബ്ലോക്ക് പഞ്ചായത്തിലും എട്ട് നഗരസഭകളിലും 91 ഗ്രാമപഞ്ചായത്തുകളിലുമായി 102 സീറ്റ് നേടി മുന്നണികളോടെപ്പമല്ലാത്ത പാര്‍ട്ടികളില്‍ ഒന്നാമതെത്താനായി. കണ്ണൂര്‍ കോര്‍പ്പറേഷനിലും തലശ്ശേരി, പൊന്നാനി എന്നീ നഗരസഭകളിലും 19 ഗ്രാമപഞ്ചായത്തുകളിലും പാര്‍ട്ടി അക്കൗണ്ട് തുറന്നു. 277 വാര്‍ഡുകളില്‍ രണ്ടാം സ്ഥാനത്തെത്തി. 50ലധികം വാര്‍ഡുകളില്‍ തുച്ഛമായ വോട്ടുകള്‍ക്കാണ് പരാജയപ്പെട്ടത്. 16 പഞ്ചായത്തുകളിലെ ഭരണത്തിന് എസ്ഡിപിഐയുടെ തീരുമാനം നിര്‍ണായകമാണ്.

എസ്ഡിപിഐയെ പരാജയപ്പെടുത്തുന്നതിനായി ബിജെപിയുമായി ഇരുമുന്നണികളും കൈകോര്‍ത്തു. മുസ്‌ലിം ലീഗ് ബിജെപിയുടെ സഹായം പ്രകടമായി തന്നെ പലയിടത്തും തേടിയിട്ടുണ്ട്. ഇത് മതേതര കേരളത്തില്‍ അപകട സൂചനയാണ്. ഇടതു സര്‍ക്കാരിന്റെ ഭരണ വിരുദ്ധ വികാരം അലയടിച്ച തിരഞ്ഞെടുപ്പായിരുന്നു ഇത്. മൃതു ഹിന്ദുത്വ നിലപാടും ശബരിമല സ്വര്‍ണക്കൊള്ളയും അമിത നികുതി ഭാരവും ഭരണകൂടത്തിനെതിരായി ജനങ്ങള്‍ മാറാന്‍ കാരണമായി. വിശ്വസിക്കാന്‍ കഴിയാത്തവരായി കോണ്‍ഗ്രസ് നേതൃത്വവും മാറി. ഈ സാഹചര്യത്തില്‍ ജനങ്ങള്‍ പുതിയ ബദലിനെ ആഗ്രഹിക്കുന്നതായും കേരളത്തിലെ രാഷ്ട്രീയ പരിസരം അതിന് അനുകൂലമായി വരുന്നതായും സിപിഎ ലത്തീഫ് പറഞ്ഞു. കോഴിക്കോട് ജില്ലാ പ്രസിഡന്റ് മുസ്തഫ കൊമ്മേരി വാര്‍ത്താ സമ്മേളനത്തില്‍ സംബന്ധിച്ചു.