കശ്മീരി പണ്ഡിറ്റുകളുടെ സുരക്ഷ വര്‍ധിപ്പിക്കണമെന്ന് കെജ്രിവാള്‍

ന്യൂഡല്‍ഹി: ജമ്മു കശ്മീരില്‍ തുടരുന്ന കൊലപാതകപരമ്പരയുടെ സാഹചര്യത്തില്‍ കശ്മീരി പണ്ഡിറ്റുകള്‍ക്ക് സുരക്ഷയൊരുക്കണമെന്ന് കെജ്രിവാള്‍. ഇക്കാര്യത്തില്‍ ആവശ്യമായ നടപടികള്‍ ഉടന്‍ സ്വീകരിക്കണമെന്നും അദ്ദേഹം കേന്ദ്ര സര്‍ക്കാരിനോട് ആവശ്യപ്പെട്ടു.

കശ്മീരിലെ സംഭവവികാസങ്ങളുടെ പേരില്‍ രാജ്യം ആശങ്കയിലാണെന്നും അദ്ദേഹം പറഞ്ഞു.

'കേന്ദ്രം ആവശ്യമായ എല്ലാ നടപടികളും സ്വീകരിക്കണമെന്ന് ഞങ്ങള്‍ ആഗ്രഹിക്കുന്നു. അവര്‍ (കശ്മീരി പണ്ഡിറ്റുകള്‍) പ്രതീക്ഷയോടെയാണ് അവിടേക്ക് മടങ്ങിയത്. അവരുടെ സുരക്ഷ ഉറപ്പാക്കണം,'- കെജ്രിവാള്‍ പറഞ്ഞു.

വിജയകുമാര്‍ എന്ന ബാങ്ക് മാനേജരാണ് കശ്മീരില്‍ അവസാനം സായുധരുടെ തോക്കിനിരയായത്.

ഒരാഴ്ച മുമ്പ് രജനി ബാലയെന്ന 36 വയസ്സുളള ഹിന്ദു സ്ത്രീയും കൊലചെയ്യപ്പെട്ടു. കഴിഞ്ഞ മാസം രാഹുല്‍ ഭട്ട് എന്ന പോലിസുകാരനും കൊല്ലപ്പെട്ടു. ഇദ്ദേഹം കശ്മീരി പണ്ഡിറ്റാണ്.

സ്ഥിതിഗതികള്‍ പരിശോധിക്കാന്‍ വേണ്ടി കേന്ദ്ര ആഭ്യന്തര മന്ത്രി ഉന്നതതല യോഗം വിളിച്ചിരുന്നു.

ദേശീയ സുരക്ഷാ ഉപദേഷ്ടാവ് അജിത് ഡോവല്‍, ഡിജിപി ദില്‍ബാഗ് സിങ് എന്നിവര്‍ യോഗത്തില്‍ പങ്കെടുത്തു.