വരാനിരിക്കുന്നത് ഉഷ്ണതരംഗ ദിനങ്ങൾ; മുന്നറിയിപ്പുമായി കാലാവസ്ഥ വകുപ്പ്

ന്യൂഡൽഹി: ഏപ്രിൽ മുതൽ ജൂൺ വരെ ഇന്ത്യയിൽ പതിവിലും കൂടുതൽ ചൂട് അനുഭവപ്പെടുമെന്നും മധ്യ, കിഴക്കൻ ഇന്ത്യയിലും വടക്കുപടിഞ്ഞാറൻ സമതലങ്ങളിലും കൂടുതൽ ഉഷ്ണതരംഗ ദിനങ്ങൾ ഉണ്ടാകുമെന്നും കേന്ദ്ര കാലാവസ്ഥ വകുപ്പ്.

ഇന്ത്യയുടെ മിക്ക ഭാഗങ്ങളിലും സാധാരണയേക്കാൾ ഉയർന്ന താപനിലയായിരിക്കും അനുഭവപ്പെടുക, എന്നാൽ കിഴക്കൻ, പടിഞ്ഞാറൻ ഇന്ത്യയിലെ ചില പ്രദേശങ്ങളിൽ താപനില സാധാരണയേക്കാൾ കൂടുതലായിരിക്കും. മിക്ക പ്രദേശങ്ങളിലും കുറഞ്ഞ താപനില സാധാരണയേക്കാൾ കൂടുതലായിരിക്കുമെന്ന് ഇന്ത്യൻ കാലാവസ്ഥാ വകുപ്പ് മേധാവി മൃത്യുഞ്ജയ് മൊഹാപത്ര പറഞ്ഞു.രാജസ്ഥാൻ, ഗുജറാത്ത്, ഹരിയാന, പഞ്ചാബ്, മധ്യപ്രദേശ്, മഹാരാഷ്ട്ര, ഉത്തർപ്രദേശ്, ബീഹാർ, ജാർഖണ്ഡ്, പശ്ചിമ ബംഗാൾ, ഒഡീഷ, ഛത്തീസ്ഗഢ്, തെലങ്കാന, ആന്ധ്രാപ്രദേശ്, കർണാടക, തമിഴ്‌നാട് എന്നിവയുടെ വടക്കൻ ഭാഗങ്ങൾ എന്നിവയാണ് സാധാരണയേക്കാൾ കൂടുതൽ ചൂട് അനുഭവപ്പെടാൻ സാധ്യതയുള്ള സംസ്ഥാനങ്ങൾ.

കിഴക്കൻ ഉത്തർപ്രദേശ്, ജാർഖണ്ഡ്, ഛത്തീസ്ഗഡ്, ഒഡീഷ എന്നിവയുൾപ്പെടെ ചില സംസ്ഥാനങ്ങളിൽ ഈ കാലയളവിൽ 10 മുതൽ 11 വരെ ഉഷ്ണതരംഗ ദിവസങ്ങൾ ഉണ്ടാകുമെന്ന് മഹാപത്ര പറഞ്ഞു. ഏപ്രിലിൽ, ഇന്ത്യയുടെ മിക്ക ഭാഗങ്ങളിലും സാധാരണയേക്കാൾ ഉയർന്ന താപനില അനുഭവപ്പെടാൻ സാധ്യതയുണ്ട്. എന്നിരുന്നാലും, തെക്കൻ, വടക്കുപടിഞ്ഞാറൻ മേഖലകളിലെ ചില പ്രദേശങ്ങളിൽ സാധാരണ താപനില അനുഭവപ്പെടാം.

താപനില ഉയരുന്ന സാഹചര്യത്തിൽ, ഹീറ്റ് സ്ട്രോക്കും ഹീറ്റ് സംബന്ധമായ അസുഖങ്ങളും കൈകാര്യം ചെയ്യാൻ ആശുപത്രികൾ തയ്യാറാണോ എന്ന് പരിശോധിക്കാൻ കഴിഞ്ഞ ആഴ്ച കേന്ദ്ര സർക്കാർ സംസ്ഥാനങ്ങളോട് ആവശ്യപ്പെട്ടിരുന്നു. ഇന്ത്യയിലെ ഏറ്റവും ചൂടേറിയതും ദൈർഘ്യമേറിയതുമായ ഉഷ്ണതരംഗങ്ങളിൽ ഒന്നായ ഈ സമയത്ത് 41,789 താപാഘാത കേസുകളും 143 താപ സംബന്ധമായ മരണങ്ങളും രേഖപ്പെടുത്തിയതായി ഔദ്യോഗിക കണക്കുകൾ വ്യക്തമാക്കുന്നു.

കഴിഞ്ഞ വർഷത്തേക്കാൾ വളരെ നേരത്തെ 2025 ൽ ഉഷ്ണതരംഗം എത്തി. 2024 ൽ ഏപ്രിൽ 5 ന് ഒഡീഷയിൽ ഇന്ത്യയുടെ ആദ്യത്തെ ഉഷ്ണതരംഗം റിപ്പോർട്ട് ചെയ്തു, എന്നാൽ ഈ വർഷം ഫെബ്രുവരി 27-28 തീയതികളിൽ തന്നെ കൊങ്കണിലെയും തീരദേശ കർണാടകയിലെയും ചില ഭാഗങ്ങളിൽ ഉഷ്ണതരംഗം അനുഭവപ്പെട്ടുവെന്നും റിപോർട്ടുകൾ ചൂണ്ടിക്കാട്ടുന്നു.