സൗജന്യ മാസ്‌ക് വിതരണം നടത്തി

മാള: മാളയില്‍ സൗജന്യ മാസ്‌ക് വിതരണം നടത്തി. കെ കരുണാകരന്‍ സ്മാരക ഹെല്‍ത്ത് സെന്ററില്‍ മാള പ്രതികരണ വേദിയാണ് കൊവിഡ് 19 സാഹചര്യത്തെ മുന്‍ നിര്‍ത്തി മാസ്‌ക് വിതരണം നടത്തിയത്. ആദ്യഘട്ടത്തില്‍ ആയിരത്തോളം മാസ്‌കാണ് വിതരണം നടത്തിയത്. അടുത്ത ഘട്ടമായി വരും ദിവസങ്ങളില്‍ സാനിട്ടറൈസറും കൂടുതല്‍ മാസ്‌ക്കും വിതരണം ചെയ്യുമെന്ന് മാള പ്രതികരണ വേദി പ്രസിഡന്റ് സലാം ചൊവ്വര അറിയിച്ചു.

ഹെല്‍ത്ത് സെന്ററിന് വേണ്ടി സൂപ്രണ്ട് ആശ സേവ്യാര്‍ മാസ്‌കുകള്‍ ഏറ്റു വാങ്ങി. മാള പ്രതികരണ വേദി അവസരോചിതമായി നടത്തിയ പ്രവൃത്തിയെ സൂപ്രണ്ട് പ്രകീര്‍ത്തിച്ചു. വിവിധ സാമൂഹിക സാംസ്‌കാരിക സംഘടനകള്‍ ഇത്തരം പ്രവര്‍ത്തനങ്ങളില്‍ മാതൃകയാവേണ്ടതിന്റെ ആവശ്യകത ഈ സന്ദര്‍ഭത്തില്‍ അനിവാര്യമാണെന്ന് സൂപ്രണ്ട് പറഞ്ഞു മാള ഹെല്‍ത്ത് സെന്ററില്‍ നടന്ന ചടങ്ങില്‍ പ്രതികരണ വേദി പ്രസിഡന്റ് സലാം ചൊവ്വര, ഭാരവാഹികളായ പി വി നിഷാദ്, ഹര്‍ഷാദ് കടവില്‍, എ എം സമദ്, ഇ സി ഫ്രാന്‍സീസ്, കെ ആര്‍ ചാക്കോ, റോയി ഇടശ്ശേരി, വി എസ് നിസാര്‍ തുടങ്ങിയവര്‍ സന്നിഹിതരായിരുന്നു.