16കാരിയെ പീഡിപ്പിച്ചെന്ന പരാതിയില്‍ പിതാവ് ഉള്‍പ്പെടെ നാലുപേര്‍ പിടിയില്‍

കാസര്‍കോട്: തൈക്കടപ്പുറത്ത് 16കാരിയെ പീഡിപ്പിച്ചെന്ന പരാതിയില്‍ മദ്‌റസ അധ്യാപകനായ പിതാവ് ഉള്‍പ്പെടെ നാലുപേര്‍ പിടിയില്‍. പെണ്‍കുട്ടി തന്നെ നീലേശ്വരം പോലിസ് സ്‌റ്റേഷനിലെത്തി നല്‍കിയ പരാതിയിലാണ് പിതാവിനു പുറമെ നീലേശ്വരം സ്വദേശികളായ റിയാസ്, മുഹമ്മദലി, പുഞ്ചാവി സ്വദേശി ഇജാസ് എന്നിവരെ പിടികൂടിയത്. എട്ടാംക്ലാസ് മുതല്‍ പിതാവ് വീട്ടില്‍ വച്ച് നിരന്തരം പീഡിപ്പിക്കാറുണ്ടെന്നാണ് പെണ്‍കുട്ടിയുടെ പരാതിയില്‍ പറയുന്നത്. ഇയാള്‍ക്കെതിരേ നേരത്തെയും പോക്‌സോ കേസ് നിലവിലുണ്ട്.

പീഡന വിവരം മാതാവിന് അറിയാമായിരുന്നുവെന്നും കുട്ടി മൊഴി നല്‍കിയതിനാല്‍ ഇവരെയും പ്രതി ചേര്‍ത്തേക്കുമെന്നാണു സൂചന. പെണ്‍കുട്ടി ഒരു തവണ ഗര്‍ഭഛിദ്രത്തിനു വിധേയമായിട്ടുണ്ടെന്നു മനസ്സിലാക്കിയ അമ്മാവനാണ് പോലിസില്‍ പരാതി നല്‍കാന്‍ ആവശ്യപ്പെട്ടത്. പെണ്‍കുട്ടി ഇപ്പോള്‍ അമ്മാവന്റെ സംരക്ഷണയിലാണ് കഴിയുന്നത്. വൈദ്യപരിശോധനയ്ക്കു ശേഷം ഹൊസ്ദുര്‍ഗ് മജിസ്‌ട്രേറ്റ് മുമ്പാകെ മൊഴി രേഖപ്പെടുത്തും.