തിരുവനന്തപുരത്തുനിന്ന് ബഹ്‌റൈനിലേക്കും ദമ്മാമിലേക്കും വിമാന സര്‍വീസ്

തിരുവനന്തപുരം: തിരുവനന്തപുരം രാജ്യാന്തര വിമാനത്താവളത്തില്‍ നിന്ന് എയര്‍ ഇന്ത്യ എക്‌സ്പ്രസ് രണ്ട് അന്താരാഷ്ട്ര സര്‍വീസ് കൂടി തുടങ്ങുന്നു. തിരുവനന്തപുരം- ബഹ്‌റൈന്‍ സര്‍വീസ് ഈ മാസം 30 മുതലും തിരുവനന്തപുരം- ദമ്മാം സര്‍വീസ് ഡിസംബര്‍ ഒന്നു മുതലും ആരംഭിക്കും. തിരുവനന്തപുരം- ബഹ്‌റൈന്‍ സര്‍വീസ് ബുധന്‍, ഞായര്‍ ദിവസങ്ങളില്‍ വൈകീട്ട് 05.35നു പുറപ്പെട്ട് 08.05ന് (പ്രാദേശിക സമയം) എത്തിച്ചേരും. തിരികെ ബഹ്‌റൈനില്‍ നിന്ന് രാത്രി 09.05 ന് പുറപ്പെട്ട് പുലര്‍ച്ചെ 04.25ന് തിരുവനന്തപുരത്തെത്തും.

തിരുവനന്തപുരം- ദമ്മാം വിമാനം ചൊവ്വ, വ്യാഴം, ശനി ദിവസങ്ങളില്‍ വൈകീട്ട് 05.35ന് പുറപ്പെട്ട് 08.25ന് എത്തും. തിരികെ ദമ്മാമില്‍ നിന്ന് രാത്രി 09.25ന് പുറപ്പെട്ട് പുലര്‍ച്ചെ 05.05ന് എത്തിച്ചേരും. 180 പേര്‍ക്ക് യാത്ര ചെയ്യാവുന്ന ബോയിങ് 737-800 വിമാനങ്ങളാണ് സര്‍വീസിന് ഉപയോഗിക്കുക. രണ്ട് സര്‍വീസുകള്‍ക്കും ബുക്കിങ് ആരംഭിച്ചു. തിരുവനന്തപുരം- ബഹ്‌റൈന്‍ സെക്ടറില്‍ സര്‍വീസ് നടത്തുന്ന രണ്ടാമത്തെ എയര്‍ലൈനായിരിക്കും എയര്‍ ഇന്ത്യ എക്‌സ്പ്രസ്. ഗള്‍ഫ് എയര്‍ ഈ റൂട്ടില്‍ ആഴ്ചയില്‍ ഏഴ് സര്‍വീസ് നടത്തുന്നുണ്ട്. തിരുവനന്തപുരം ദമ്മാം സെക്ടറില്‍ ഇത് ആദ്യസര്‍വീസാണ്.