കശ്മീരിനെക്കുറിച്ചുള്ള വിവാദപരാമര്‍ശം; കെ ടി ജലീലിനെതിരേ കേസെടുക്കാന്‍ കോടതി ഉത്തരവ്

പത്തനംതിട്ട: കശ്മീരിനെക്കുറിച്ചുള്ള വിവാദപരാമര്‍ശത്തില്‍ കെ ടി ജലീല്‍ എംഎല്‍എക്കെതിരേ കേസെടുക്കാന്‍ കോടതി ഉത്തരവിട്ടു. തിരുവല്ല ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയാണ് നിര്‍ദേശം നല്‍കിയത്. ജലീലിന്റെ വിവാദ പരാമര്‍ശത്തില്‍ കേസെടുക്കണമെന്നാവശ്യപ്പെട്ട് ആര്‍എസ്എസ് ജില്ലാ പ്രചാര്‍ പ്രമുഖ് അരുണ്‍ മോഹന്‍ നല്‍കിയ ഹരജിയിലാണ് നടപടി.

പത്തനംതിട്ട കീഴ്‌വായ്പ്പൂര് സിഐക്കാണ് കോടതി നിര്‍ദേശം നല്‍കിയത്. കെ ടി ജലീലിന്റെ വിവാദ ഫേസ്ബുക്ക് പോസ്റ്റിനെത്തുടര്‍ന്ന് അരുണ്‍ മോഹന്‍ നേരത്തെ കീഴ് വായ്പ്പൂര് സ്‌റ്റേഷനില്‍ പരാതി നല്‍കിയിരുന്നു. ഇതില്‍ നടപടിയാവാത്തതിനെത്തുടര്‍ന്നാണ് കോടതിയെ സമീപിച്ചത്. 156,156(3) എന്നീ വകുപ്പുകള്‍ പ്രകാരം കേസെടുക്കാനാണ് കോടതി നിര്‍ദേശം.