മൂന്നര വയസ്സുകാരി മീന്‍കുളത്തില്‍ മുങ്ങി മരിച്ചു

കല്‍പ്പറ്റ: വയനാട് തൊണ്ടര്‍നാട് മണിക്കൂറുകള്‍ക്കുള്ളില്‍ രണ്ടാമതൊരു കുട്ടി കൂടി മുങ്ങി മരിച്ചു. ബന്ധുവിന്റെ മരണവീട്ടില്‍ കുടുംബത്തോടൊപ്പമെത്തിയ മൂന്നര വയസ്സുകാരിയാണ് പ്ലാസ്റ്റിക് വെച്ച് നിര്‍മിച്ച ചെറിയ മീന്‍കുളത്തില്‍ വീണ് മരിച്ചത്. കോറോം മരച്ചുവട് പഴഞ്ചേരി ഹാഷിം- ഷഹന ദമ്പതിമാരുടെ ഏക മകള്‍ ഷഹദ ഫാത്തിമയാണ് മരിച്ചത്. ഹാഷിമിന്റെ ബന്ധുവായ പനമരം ഹൈസ്‌കൂള്‍ റോഡിലെ പുതിയ പുരയില്‍ ഖാലിദ് ഞായറാഴ്ച മരണപ്പെട്ടിരുന്നു.

ഹാഷിമിന്റെ ഭാര്യയും മകളും ഖാലിദിന്റെ വീട്ടിലെത്തിയിരുന്നു. ഇന്ന് വൈകുന്നേരം അഞ്ചരയോടെ ഷഹദ- ഫാത്തിമയെ കാണാതായതിനെ തുടര്‍ന്ന് ബന്ധുക്കള്‍ തിരച്ചില്‍ നടത്തുന്നതിന്നിടയിലാണ് വീടിനോട് ചേര്‍ന്നുള്ള മീന്‍കുളത്തില്‍ കുട്ടിയെ അബോധാവസ്ഥയില്‍ കണ്ടെത്തിയത്. ഉടന്‍ ആശുപത്രിയിലെത്തിച്ചെങ്കിലും മരണപ്പെടുകയായിരുന്നു. മൃതദേഹം മാനന്തവാടി ഗവ. മെഡിക്കല്‍ കോളജ് മോര്‍ച്ചറിയില്‍.