യുവ ബംഗാളി നടി ഐന്‍ഡ്രില ശര്‍മ അന്തരിച്ചു

കൊല്‍ക്കത്ത: യുവ ബംഗാളി നടി ഐന്‍ഡ്രില ശര്‍മ (24) അന്തരിച്ചു. മസ്തിഷ്‌കാഘാതത്തെത്തുടര്‍ന്ന് ചികില്‍സയിലായിരുന്നു. മൂര്‍ഷിദാബാദ് ജില്ലക്കാരിയായ ഐന്‍ഡ്രില ബംഗാളി ടെലിവിഷനിലെ പരിചിതമുഖമാണ്. ജിയോണ്‍ കാതി, ജുമൂര്‍, ജിബാന്‍ ജ്യോതി തുടങ്ങിയ സീരിയലുകളില്‍ അഭിനയിച്ചിരുന്നു.

രണ്ടുവട്ടം അര്‍ബുദബാധിതയായ ഇവര്‍ 2015ലാണ് അഭിനയരംഗത്തേക്ക് തിരിച്ചെത്തിയത്. എല്ലുകളിലോ എല്ലുകള്‍ക്ക് ചുറ്റുമുള്ള മൃദുവായ ടിഷ്യൂകളിലോ ഉണ്ടാവുന്ന അപൂര്‍വതരം കാന്‍സറായ എവിങ്‌സ് സാര്‍ക്കോമയാണ് ഐന്‍ഡ്രില ശര്‍മയ്ക്ക് ബാധിച്ചത്. അടുത്തിടെ മസ്തിഷ്‌കാഘാതം സംഭവിച്ച് ഗുരുതരാവസ്ഥയിലാവുകയായിരുന്നു. സമീപകാലത്ത് സഭ്യസാച്ചി ചൗധരിക്കൊപ്പം 'ഭാഗാര്‍' വെബ്‌സീരീസില്‍ അഭിനയിച്ചിരുന്നു.