കടലുണ്ടിയില്‍ കടലില്‍ മീന്‍ പിടിക്കുന്നതിനിടെ 17കാരനെ കാണാതായി

വള്ളിക്കുന്ന്: കടലുണ്ടിക്കടവിന് സമീപം കടലില്‍ മീന്‍പിടിക്കുന്നതിനിടെ തിരയില്‍പെട്ട് യുവാവിനെ കാണാതായി. കടലുണ്ടി നഗരം കലന്തന്റെ പുരയ്ക്കല്‍ സലാമിന്റെ മകന്‍ മുസമ്മില്‍ (17)നെയാണ് കാണാതായത്. ഇന്നു വൈകീട്ട് നാലോടെയാണ് സംഭവം. തീരത്തോട് ചേര്‍ന്ന് കടലില്‍ മുങ്ങി മീന്‍ പിടിക്കുന്നതിനിടെ തിരയില്‍ പെടുകയായിരുന്നു. ചാലിയം തീരദേശ പോലിസും മല്‍സ്യത്തൊഴിലാളികളും സംയുക്തമായി വിവിധയിടങ്ങളില്‍ തിരച്ചില്‍ പുരോഗമിക്കുകയാണ്. പരപ്പനങ്ങാടി പോലിസും സ്ഥലത്തെത്തിയിട്ടുണ്ട്. കാലവര്‍ഷം ആരംഭിച്ചതോടെ മേഖലയില്‍ കടല്‍ക്ഷോഭിച്ചിരിക്കുകയാണ്. ഇത് രക്ഷാ പ്രവര്‍ത്തനങ്ങള്‍ക്ക് തടസ്സം സൃഷ്ടിക്കുന്നുണ്ട്.