ഓസ്‌കര്‍ ചടങ്ങുകള്‍ക്ക് ഇറാന്‍ ഡ്രോണ്‍ ആക്രമണ ഭീഷണി; കനത്ത സുരക്ഷ

ലോസ്ആഞ്ചലസ്: 98ാമത് ഓസ്‌കര്‍ പുരസ്‌കാര ചടങ്ങുകള്‍ നടക്കുക കനത്ത സുരക്ഷയില്‍. മാര്‍ച്ച് 15-ന് ലോസ് ആഞ്ചലിസിലെ ഡോള്‍ബി തിയേറ്ററില്‍ നടക്കാനിരിക്കുന്ന ചടങ്ങിനെ ലക്ഷ്യംവെച്ച് ഇറാന്റെ ഡ്രോണ്‍ ആക്രമണം ഉണ്ടായേക്കാമെന്ന മുന്നറിയിപ്പിനെത്തുടര്‍ന്നാണ് ഈ നടപടി. യുഎസ് വെസ്റ്റ് കോസ്റ്റ് ലക്ഷ്യമാക്കി ഇത്തരം ഭീഷണിയുണ്ടാകാന്‍ സാധ്യതയുണ്ടെന്ന് എഫ്ബിഐ (എആക) ഔദ്യോഗികമായി മുന്നറിയിപ്പ് നല്‍കി.

എബിസി ന്യൂസ് ആണ് സുരക്ഷാ ഭീഷണി സംബന്ധിച്ച വിവരം ആദ്യമായി റിപ്പോര്‍ട്ട് ചെയ്തത്. ഓസ്‌കാര്‍ ചടങ്ങിന് ഏതാനും ദിവസങ്ങള്‍ മാത്രം ബാക്കിനില്‍ക്കെയാണ് അതീവ ജാഗ്രത പാലിക്കാന്‍ അധികൃതര്‍ നിര്‍ദ്ദേശിച്ചിരിക്കുന്നത്. പൊതുജന സുരക്ഷ ഉറപ്പാക്കുന്നതിനായി ഉയര്‍ന്ന സജ്ജീകരണങ്ങളോടെ പ്രവര്‍ത്തിച്ചുവരികയാണെന്നും, നിരീക്ഷണം ശക്തമാക്കിയതായും ലോസ് ആഞ്ചലിസ് കൗണ്ടി ഷെരീഫ് ഡിപ്പാര്‍ട്ട്മെന്റ് പ്രസ്താവനയിലൂടെ അറിയിച്ചു.

ചടങ്ങിന്റെ സുരക്ഷയെക്കുറിച്ച് ഓസ്‌കര്‍ എക്‌സിക്യൂട്ടീവ് പ്രൊഡ്യൂസറായ രാജ് കപൂര്‍ മാധ്യമങ്ങളോട് പ്രതികരിച്ചു. എഫ്ബിഐ, എല്‍എപിഡി (LAPD) എന്നിവയുടെ പിന്തുണയോടെ ലോകത്തിലെ തന്നെ മികച്ച ഒരു സുരക്ഷാ ടീമാണ് ചടങ്ങിനായി പ്രവര്‍ത്തിക്കുന്നതെന്ന് അദ്ദേഹം വ്യക്തമാക്കി. അതിഥികളുടെയും കാണികളുടെയും സുരക്ഷയ്ക്കാണ് തങ്ങള്‍ മുന്‍ഗണന നല്‍കുന്നത്. എല്ലാവര്‍ക്കും സുരക്ഷിതമായി ചടങ്ങില്‍ പങ്കെടുക്കാന്‍ കഴിയുന്ന സാഹചര്യം ഉറപ്പാക്കുമെന്നും അദ്ദേഹം കൂട്ടിച്ചേര്‍ത്തു.

റെഡ് കാര്‍പെറ്റ് ഉള്‍പ്പെടെയുള്ള എല്ലാ പരിപാടികളും അതീവ രഹസ്യവും എന്നാല്‍ കര്‍ശനവുമായ സുരക്ഷാ വലയത്തിലായിരിക്കും നടക്കുക. എന്നാല്‍ സുരക്ഷാ ഭീഷണികള്‍ക്കിടയിലും ആഘോഷത്തിന്റെ അന്തരീക്ഷം ഒട്ടും ചോര്‍ന്നുപോകാതെ ചടങ്ങുകള്‍ പൂര്‍ത്തിയാക്കാനാണ് സംഘാടകര്‍ ശ്രമിക്കുന്നത്. അമേരിക്കന്‍ സമയം മാര്‍ച്ച് 15-നാണ് ചടങ്ങുകള്‍ നടക്കുന്നത്. സമയവ്യത്യാസം കാരണം ഇന്ത്യയിലുള്ളവര്‍ക്ക് മാര്‍ച്ച് 16-ന് പുലര്‍ച്ചെ ജിയോ ഹോട്ട്സ്റ്റാര്‍ വഴി ഈ പുരസ്‌കാര നിശ തത്സമയം കാണാന്‍ സാധിക്കും.