സൂര്യഗ്രഹണത്തെ കുറിച്ച് ഭീതി പരത്തുന്നു: ബംഗളൂരുവില്‍ ജ്യോതിഷികള്‍ക്കെതിരേ യുക്തിവാദികളുടെ പ്രതിഷേധ ധര്‍ണ!

ബംഗളൂരു: സൂര്യഗ്രഹണത്തെ കുറിച്ച് ഭീതി പരത്തുന്നുവെന്നാരോപിച്ച് യുക്തിവാദികള്‍ ബംഗളൂരുവില്‍ ധര്‍ണ നടത്തി. മൗര്യസ് ല സര്‍ക്കിളില്‍ നടന്ന അന്ധവിശ്വാസവിരുദ്ധ പ്രതിഷേധത്തില്‍ നിരവധി യുക്തിവാദികളും മനുഷ്യാവകാശപ്രവര്‍ത്തകരും പങ്കെടുത്തു.

ഗ്രഹണത്തെ സംബന്ധിച്ച് ജ്യോതിഷികള്‍ തെറ്റായ കാര്യങ്ങള്‍ പരത്തുന്നുവെന്നും അത് അപകടമാണെന്നുമാണ് യുക്തിവാദികളുടെ ആരോപണം.

ചില ജ്യോതിഷികള്‍ ഗര്‍ഭിണികള്‍ ഗ്രഹണ സമയത്ത് ഒന്നും കഴിക്കുകയോ കുടിക്കുകയോ ചെയ്യരുതെന്ന്് പറയുന്നു. അങ്ങനെ ചെയ്യാതിരുന്ന് ആരെങ്കിലും മരിച്ചാല്‍ ആര് സമാധാനം പറയുമെന്ന് യുക്തിവാദി നേതാവായ നരസിംഹ മൂര്‍ത്തി ചോദിച്ചു. പ്രതിഷേധ ധര്‍ണയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. പ്രകൃതി പ്രതിഭാസങ്ങളെ കുറിച്ച് തെറ്റായ കാര്യങ്ങള്‍ പ്രചരിപ്പിക്കുന്നതിനെതിരാണ് സമരം. എല്ലാ രോഗവും നാട്ടില്‍ നിന്നു പോകും കൊവിഡും പോകും പക്ഷേ, അന്ധവിശ്വാസം പോകില്ലെന്ന് അദ്ദേഹം പറഞ്ഞു.

ഈ വര്‍ഷത്തെ ആദ്യ സ്യൂര്യഗ്രഹണമാണ് ജൂണ്‍ 21 ന് നടന്നത്.