വിപിന്‍ റാവത്തിന്റെ വേര്‍പാടില്‍ ആദരാഞ്ജലി അര്‍പ്പിച്ച് എന്‍എസ്എസ് വളണ്ടിയര്‍മാര്‍

താനൂര്‍: സംയുക്ത സേനാ മേധാവി ജനറല്‍ വിപിന്‍ റാവത്തിന്റെയും അപകടത്തില്‍ മരണപ്പെട്ട മറ്റു യാത്രികരുടെയും വേര്‍പാടില്‍ വളവന്നൂര്‍ ബാഫഖി യത്തീംഖാന ഹയര്‍ സെക്കന്‍ഡറി എന്‍എസ്എസ് യൂനിറ്റിന്റെ ആഭിമുഖ്യത്തില്‍ അധ്യാപകരും വിദ്യാര്‍ഥികളും അനുശോചനം രേഖപ്പെടുത്തി. അനുശോചനത്തിന്റെ ഭാഗമായി അധ്യാപകരും വളണ്ടിയര്‍മാരും കറുത്ത ബാഡ്ജ് അണിഞ്ഞു. സ്‌കൂളിലെ മുഴുവന്‍ വിദ്യാര്‍ഥികളെയും ഉള്‍പ്പെടുത്തിക്കൊണ്ട് മൗന പ്രാര്‍ത്ഥനയും നടന്നു.

രാജ്യത്തിന് നഷ്ടമായത് വീരനായകനെയാണെന്നും സൈന്യത്തിന്റെ കരുത്തും പ്രഹരശേഷിയും ഉത്തരോത്തരം വര്‍ധിപ്പിക്കുന്നതിലും കാലാനുസൃതമായ നവീകരണത്തിലും റാവത്ത് നല്‍കിയ നേതൃത്വം ശ്ലാഘിക്കപ്പെട്ടതാണെന്നും യോഗം അനുശോചന സന്ദേശത്തില്‍ വ്യക്തമാക്കി. സ്‌കൂള്‍ പ്രിന്‍സിപ്പാള്‍ ഐ പി പോക്കര്‍, പ്രോഗ്രാം ഓഫിസര്‍ സിദ്ദീഖ് കെ മൂന്നിയൂര്‍, എന്‍എസ്എസ് വളണ്ടീയര്‍മാരായ അബ്ദുല്‍ അഹദ്, കെ തെസ്‌രീഫ്, മുഹമ്മദ് സിനാന്‍, എം പി വന്ദന തുടങ്ങിയവര്‍ നേതൃത്വം നല്‍കി.