മൂന്നാറില്‍ പുലിയുടെ ആക്രമണത്തില്‍ തൊഴിലാളിക്ക് പരിക്ക്

ഇടുക്കി: മൂന്നാറില്‍ പുലിയുടെ ആക്രമണത്തില്‍ തൊഴിലാളിക്ക് പരിക്കേറ്റു. കല്ലാര്‍ പുതുക്കാട് എസ്‌റ്റേറ്റില്‍ പശുവിനുള്ള പുല്ല് അരിയുന്നതിനിടെയാണ് തൊഴിലാളിയായ സേലെരാജന് നേരെ പുലിയുടെ ആക്രമണമുണ്ടായത്. സേലെരാജന് ഉച്ചത്തില്‍ നിലവിളിച്ചതോടെ പുലി കാട്ടിലേക്ക് ഓടിമറഞ്ഞു.

പുലിയുടെ നഖം കൊണ്ട് സേലെരാജന്റെ മുതുകില്‍ അഴത്തിലുള്ള അഞ്ചോളം മുറിവുകളുണ്ട്. മൂന്നാര്‍ ടാറ്റാ ജനറല്‍ ആശുപത്രിയില്‍ ചികില്‍സയിലാണ് ഇയാള്‍. കഴിഞ്ഞ കുറച്ചുനാളുകളായി തോട്ടംമേഖലയില്‍ പുലിയുടെയും കടുവയുടെയും സാന്നിധ്യമേറെയാണ്. തൊഴിലാളികളുടെ ഉപജീവനമാര്‍ഗമായ നിരവധി കന്നുകാലികളും കൊല്ലപ്പെട്ടു. നിരവധി പ്രതിഷേധങ്ങളും സമരങ്ങളുമാണ് വനം വകുപ്പിനെതിരേ ഉയര്‍ന്നുവരുന്നത്.