ഗാന്ധി സ്മൃതി മന്ദിരത്തില്‍ നിന്ന് ഗാന്ധിജി വെടിയേറ്റുവീണ ചിത്രം നീക്കംചെയ്തു

പ്രശസ്ത ഫ്രഞ്ച് ഫോട്ടോഗ്രഫര്‍ ഹെന്റി കാര്‍ട്ടിയര്‍ ബ്രസനാണ് ഗാന്ധിജിയുടെ അന്ത്യനിമിഷങ്ങള്‍ പകര്‍ത്തിയത്. 1948 ജനുവരി 30നാണ് രാഷ്ട്രപിതാവ് മഹാത്മാ ഗാന്ധിയെ നാഥുറാം വിനായക് ഗോഡ്‌സേ വെടിവച്ചു കൊലപ്പെടുത്തിയത്.

ഗാന്ധി സ്മൃതി മന്ദിരത്തില്‍ നിന്ന് ഗാന്ധിജി വെടിയേറ്റുവീണ ചിത്രം നീക്കംചെയ്തു

ന്യൂഡല്‍ഹി: ഡല്‍ഹിയിലെ ഗാന്ധി സ്മൃതി മന്ദിരമായ ബിര്‍ളാ ഹൗസില്‍ നിന്ന് മഹാത്മാഗാന്ധി വെടിയേറ്റുമരിച്ച് കിടക്കുന്ന ചിത്രങ്ങള്‍ നീക്കം ചെയ്‌തെന്ന് ആരോപണം. ഗാന്ധിജിയുടെ പൗത്രന്‍ തുഷാര്‍ ഗാന്ധിയാണ് ആരോപണവുമായി രംഗത്തെത്തിയത്. ''ബാപ്പുവിന്റെ ഘാതകര്‍ ചരിത്രപ്രമാണങ്ങളെപ്പോലും ഇല്ലാതാക്കുകയാണ്, ഹേ റാം'' എന്നാണ് തുഷാര്‍ ഗാന്ധി ട്വിറ്ററില്‍ കുറിച്ചത്. 'പ്രധാന്‍ സേവകി'ന്റെ നിര്‍ദേശ പ്രകാരമാണ് ബിര്‍ളാ ഹൗസിലെ ഗാലറിയില്‍ നിന്ന് ചിത്രങ്ങള്‍ മാറ്റിയതെന്ന് പ്രധാനമന്ത്രിയെ ലക്ഷ്യമിട്ട് അദ്ദേഹം ആരോപിച്ചു. ഗാന്ധി സ്മൃതി മന്ദിരത്തിന്റെയും ദര്‍ശന്‍ സമിതിയുടെയും അധ്യക്ഷന്‍ പ്രധാനമന്ത്രിയാണ്. കേന്ദ്ര സര്‍ക്കാരിന്റെ സാംസ്‌കാരിക മന്ത്രാലയത്തിനു കീഴിലുള്ള സ്വയംഭരണകേന്ദ്രമാണ് ബിര്‍ളാ ഹൗസ്.

ഇന്ത്യ മാറിയാലും ഇല്ലെങ്കിലും ഇന്ത്യാ ചരിത്രത്തെ മാറ്റാനുള്ള ശ്രമങ്ങള്‍ നടക്കുന്നുണ്ടെന്നും മറ്റൊരു ട്വീറ്റില്‍ തുഷാര്‍ ഗാന്ധി ആരോപിച്ചു. വിമര്‍ശനത്തെ താന്‍ ഭയക്കുന്നില്ലെന്നും എന്നാല്‍ നുണപ്രചാരണം ദൗര്‍ഭാഗ്യകരമാണെന്നും സാംസ്‌കാരിക മന്ത്രി പ്രഹ്ലാദ് സിങ് പട്ടേല്‍ പ്രതികരിച്ചു. ചിത്രത്തിന്റെ നിറംമങ്ങിയതിനാലാണ് മാറ്റിയതെന്നും ഇത് ഡിജിറ്റല്‍ ദൃശ്യങ്ങളിലുണ്ടെന്നും മന്ത്രി കൂട്ടിച്ചേര്‍ത്തു. സ്വാതന്ത്ര്യം ലഭിച്ച ശേഷം ഗാന്ധി അവസാനമായി ചെലവഴിച്ചതും വെടിയേറ്റുവീണതും ഡല്‍ഹി തീസ് ജനുവരി മാര്‍ഗില ബിര്‍ളാഹൗസിലാണ്. നാഥുറാം വിനായക് ഗോഡ്‌സെയുടെ വെടിയേറ്റ് ഗാന്ധിജി കൊല്ലപ്പെട്ട ശേഷം ഇവിടെ മ്യൂസിയമാക്കുകയായിരുന്നു. പ്രശസ്ത ഫ്രഞ്ച് ഫോട്ടോഗ്രഫര്‍ ഹെന്റി കാര്‍ട്ടിയര്‍ ബ്രസനാണ് ഗാന്ധിജിയുടെ അന്ത്യനിമിഷങ്ങള്‍ പകര്‍ത്തിയത്. 1948 ജനുവരി 30നാണ് രാഷ്ട്രപിതാവ് മഹാത്മാ ഗാന്ധിയെ നാഥുറാം വിനായക് ഗോഡ്‌സേ വെടിവച്ചു കൊലപ്പെടുത്തിയത്.




RELATED STORIES

Share it
Top