കൊവിഡ് ഉയര്‍ന്നുതന്നെ;രാജ്യത്ത് 16,159 പുതിയ രോഗികള്‍,28 മരണം

ന്യൂഡല്‍ഹി: രാജ്യത്ത് പ്രതിദിന കൊവിഡ് രോഗികളുടെ ഗ്രാഫ് ഉയര്‍ന്നുതന്നെ.കഴിഞ്ഞ 24 മണിക്കൂറിനുള്ളില്‍ 16,159 പേര്‍ക്കാണ് വൈറസ് ബാധ സ്ഥിരീകരിച്ചത്.ടിപിആര്‍ 3.56 ശതമാനമാണ്.കഴിഞ്ഞ ദിവസത്തേതിനെക്കാള്‍ രോഗികളുടെ എണ്ണത്തില്‍ 3,073 പേരുടെ വര്‍ധനവ് ഉണ്ടായതായി കേന്ദ്ര ആരോഗ്യമന്ത്രാലയം അറിയിച്ചു.28 കൊവിഡ് മരണങ്ങളും റിപോര്‍ട്ട് ചെയ്തിട്ടുണ്ട്.

രാജ്യത്തെ സജീവ രോഗികളുടെ എണ്ണം 1,15,212 ആയി.ഇതോടെ രാജ്യത്ത് ഇതുവരെ റിപോര്‍ട്ട് ചെയ്യപ്പെട്ട കൊവിഡ് കേസുകളുടെ എണ്ണം 4,35,47,809 ആയി. ഇന്നലെ 15,394 പേര്‍ രോഗമുക്തി നേടി.രോഗമുക്തി നിരക്ക് 98.53 ശതമാനമാണ്.

രാജ്യത്തെ കൊവിഡ് കേസുകളില്‍ ഭൂരിഭാഗവും കേരളം, മഹാരാഷ്ട്ര, തമിഴ്‌നാട്, ഡല്‍ഹി എന്നിവിടങ്ങളില്‍ നിന്നാണ്. മഹാരാഷ്ട്രയില്‍ തിങ്കളാഴ്ച രോഗികളുടെ എണ്ണത്തില്‍ കുറവുണ്ടായെങ്കിലും ഇന്നലെ രോഗികളുടെ എണ്ണത്തില്‍ വര്‍ധനവുണ്ടായി.24 മണിക്കൂറിനിടെ 3,098 പേര്‍ക്കാണ് വൈറസ് ബാധ സ്ഥിരീകരിച്ചത്.ആറ് കൊവിഡ് മരണങ്ങളും റിപോര്‍ട്ട് ചെയ്തു. മൂംബൈയില്‍ പ്രതിദിന രോഗികള്‍ കുറയുന്നുണ്ടെങ്കിലും മറ്റ് ജില്ലകളില്‍ കേസുകള്‍ വര്‍ധിക്കുന്നതായി ആരോഗ്യമന്ത്രാലയം അറിയിച്ചു. ഡല്‍ഹിയില്‍ ഇന്നലെ 600ലേറെയാണ് രോഗികള്‍. തമിഴ്‌നാട്ടിലും കൊവിഡ് ബാധിതരുടെ എണ്ണത്തില്‍ വന്‍ വര്‍ധനവുണ്ടായി. 24 മണിക്കൂറിനിടെ 2,662 പേര്‍ക്കാണ് വൈറസ് ബാധ. ചെന്നൈയില്‍ 1000ലേറെയാണ് രോഗികള്‍.

വാക്‌സിനേഷന്‍ പുരോഗമിക്കുകയാണ്. ഇതുവരെ 198 കോടി വാക്‌സിന്‍ ഡോസുകള്‍ വിതരണം ചെയ്തതായി ആരോഗ്യ മന്ത്രാലയത്തിന്റെ കണക്കുകള്‍ വ്യക്തമാക്കുന്നു.