കേന്ദ്ര ബജറ്റ്: 'സാമ്പത്തിക അച്ചടക്കവും സുസ്ഥിര വളര്‍ച്ചയും ലക്ഷ്യമെന്ന് നിര്‍മ്മല സീതാരാമന്‍

ന്യൂഡല്‍ഹി: സാമ്പത്തിക അച്ചടക്കവും സുസ്ഥിര വികസനവുമാണ് തങ്ങളുടെ ലക്ഷ്യമെന്ന് കേന്ദ്ര ബജറ്റ് അവതരിപ്പിക്കവേ ധനമന്ത്രി നിര്‍മ്മല സീതാരാമന്‍ പറഞ്ഞു. പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ധനമന്ത്രി നിര്‍മ്മല സീതാരാമന്‍ തുടര്‍ച്ചയായി ഒമ്പതാമത്തെ ബജറ്റ് പ്രസംഗമാണിത്. ഇന്ത്യയുടെ വളര്‍ച്ചയുടെ പാതയിലാണെന്ന് ധനമന്ത്രി പറഞ്ഞു. ആഗോള പ്രതിസന്ധിക്കിടയിലും വളര്‍ച്ച നേടാനായി. ആഭ്യന്തര ഉല്‍പാദനം വര്‍ധിച്ചു. ദാരിദ്ര്യം കുറക്കാനായതായും ധനമന്ത്രി അവകാശപ്പെട്ടു. സര്‍ക്കാരിന്റെ എല്ലാ നടപടികളും പൗരന്മാരുടെ ക്ഷേമത്തിന് വേണ്ടിയാണെന്നും നിര്‍മല സീതാരാമന്‍ കൂട്ടിച്ചേര്‍ത്തു.

ഇന്ത്യയുടെ സാമ്പത്തിക ചരിത്രത്തില്‍ ആദ്യമായാണ് ഒരു ഞായറാഴ്ച ബജറ്റ് അവതരിപ്പിക്കുന്നത്. പന്ത്രണ്ട് ലക്ഷം വരെ വരുമാനം ഉള്ളവരെ ആദായ നികുതിയില്‍ നിന്ന് കഴിഞ്ഞ തവണ ഒഴിവാക്കിയിരുന്നു. ഈ സാഹചര്യത്തില്‍ ആദായനികുതിയില്‍ കാര്യമായ ഇളവ് ഇത്തവണ പ്രതീക്ഷിക്കുന്നില്ല. നിയമസഭാ തെരഞ്ഞെടുപ്പു മുന്നില്‍കണ്ട് ബജറ്റില്‍ പ്രത്യേക പദ്ധതികള്‍ പ്രഖ്യാപിക്കുമെന്ന പ്രതീക്ഷയിലാണ് കേരളം ഉള്‍പ്പെടെയുള്ള സംസ്ഥാനങ്ങള്‍.