''കുടിയേറ്റക്കാരെ കണ്ടെത്താന്‍ ഓരോ നഗരത്തിലും റെയ്ഡ് നടത്തും'':പദ്ധതി പ്രഖ്യാപിച്ച് ടീം ട്രംപ്

വാഷിങ്ടണ്‍: യുഎസില്‍ നിയമവിരുദ്ധമായി കുടിയേറിയവരെ കണ്ടെത്താന്‍ എല്ലാ നഗരങ്ങളിലും റെയ്ഡ് നടത്തുമെന്ന് നിയുക്ത യുഎസ് പ്രസിഡന്റ് ഡോണള്‍ഡ് ട്രംപിന്റെ ടീം. ന്യൂയോര്‍ക്കിലും മിയാമിയിലും വരെ റെയ്ഡുകള്‍ നടത്താനാണ് തീരുമാനിച്ചിരിക്കുന്നത്. ട്രംപ് അധികാരമേല്‍ക്കുന്ന ജനുവരി 20 കഴിഞ്ഞ് 21ന് ചിക്കാഗോയിലായിരിക്കും ആദ്യമായി റെയ്ഡുകള്‍ നടക്കുക. ഇതിനായി 100 യുഎസ് ഇമിഗ്രേഷന്‍ ഉദ്യോഗസ്ഥരെയും 200 കസ്റ്റംസ് എന്‍ഫോഴ്‌സ്‌മെന്റ് ഉദ്യോഗസ്ഥരെയും ഉപയോഗിക്കും. താന്‍ അധികാരത്തിലേറി കഴിഞ്ഞാല്‍ നിയമവിരുദ്ധമായി യുഎസില്‍ കുടിയേറിയ എല്ലാവരെയും സ്വന്തം രാജ്യത്തേക്ക് മടക്കി അയക്കുമെന്ന് ട്രംപ് ജനുവരിയില്‍ പ്രഖ്യാപിച്ചിരുന്നു. ചരിത്രത്തിലെ ഏറ്റവും വലിയ അനധികൃത കുടിയേറ്റവിരുദ്ധ നടപടി ആയിരിക്കും ഇതെന്നും അദ്ദേഹം വ്യക്തമാക്കി.