ആറ്റിങ്ങലില്‍ കാറും ലോറിയും കൂട്ടിയിടിച്ച് മൂന്നുമരണം; അഞ്ചുപേര്‍ക്ക് പരിക്ക്

ആറ്റിങ്ങല്‍: ദേശീയപാതയില്‍ ആറ്റിങ്ങല്‍ ടിബി ജങ്ഷനില്‍ കാറും ലോറിയും കൂട്ടിയിടിച്ച് മൂന്നുപേര്‍ മരിച്ചു. അഞ്ചുപേര്‍ക്ക് ഗുരുതര പരുക്ക്. മംഗലാപുരത്തു നിന്ന് പാലുമായി വരികയായിരുന്ന തമിഴ്‌നാട് റജിസ്‌ട്രേഷനുള്ള ലോറിയാണ് മംഗലപുരത്ത് നിന്ന് കല്ലുവാതുക്കലിലേക്ക് പോവുകയായിരുന്നു കാറുമായി കൂട്ടിയിടിച്ചത്. ഞായറാഴ്ച രാത്രി 11.45 ഓടെയാണ് സംഭവം. എട്ടുയാത്രക്കാരാണ് കാറിലുണ്ടായിരുന്നത്. മരണപ്പെട്ടവരെ കുറിച്ച് വ്യക്തമായ വിവരം ലഭിച്ചിട്ടില്ലെന്നു പോലിസ് പറഞ്ഞു. എല്ലാവരുടെയും നില അതീവ ഗുരുതരമാണ്.

അപകടത്തിനു ശേഷം ഏറെനേരം കാറില്‍ കുടുങ്ങിയ യാത്രക്കാരെ ഇതുവഴിയെത്തിയ വാഹനങ്ങളിലുള്ളവരും നാട്ടുകാരും വിവരമറിയിച്ചതിനെ തുടര്‍ന്ന് ഫയര്‍ഫോഴ്‌സെത്തിയാണ് പുറത്തെടുത്തത്. ഒരാള്‍ സംഭവസ്ഥലത്ത് തന്നെ മരണപ്പെട്ടു. രണ്ടുപേര്‍ ആശുപത്രിയിലെത്തിയപ്പോഴേക്കും മരണപ്പെട്ടിരുന്നു. പരിക്കേറ്റവരെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.ഇരു വാഹനങ്ങളും നേര്‍ക്കുനേര്‍ ഇടിക്കുകയായിരുന്നു എന്നാണ് വിവരം. ഇടിയുടെ ആഘാതത്തില്‍ കാര്‍ പൂര്‍ണമായും തകര്‍ന്നു.