കോളറ രോഗലക്ഷണങ്ങളോട് ചികിത്സയിലായിരുന്ന ആള്‍ മരിച്ചു

ആലപ്പുഴ: കോളറ ബാധ ലക്ഷണങ്ങളോടെ സ്വകാര്യ ആശുപത്രിയില്‍ ചികിത്സയില്‍ കഴിഞ്ഞിരുന്നയാള്‍ മരിച്ചു. തലവടി സ്വദേശി പി ജി രഘു(48)വാണ് മരിച്ചത്. െ്രെഡവറായി ജോലി ചെയ്യുകയായിരുന്നു. എവിടെനിന്നാണ് രഘുവിന് രോഗം ബാധിച്ചതെന്ന് സ്ഥിരീകരിച്ചിട്ടില്ല. കടുത്ത വയറിളക്കവും ഛര്‍ദിയുമായാണ് രഘുവിനെ സ്വകാര്യ മെഡിക്കല്‍ കോളജില്‍ പ്രവേശിപ്പിച്ചത്. ഇവിടെ നടത്തിയ പരിശോധനയിലാണ് കോളറയുടെ ലക്ഷണങ്ങള്‍ കണ്ടെത്തിയത്. കരള്‍ സംബന്ധമായ അസുഖങ്ങള്‍ കൂടി ഉള്ളയാളാണ്. രക്തപരിശോധനയില്‍ കോളറ സാന്നിധ്യം കണ്ടെത്തിയിട്ടുണ്ട്. എന്നാല്‍ രോഗം സ്ഥിരീകരിക്കാന്‍ വിസര്‍ജ്യ പരിശോധനാഫലം കൂടി ലഭിക്കണം. പരിശോധനാഫലം ഇന്നലെയും ലഭിക്കാത്തതിനാല്‍ രോഗം ഔദ്യോഗികമായി സ്ഥിരീകരിച്ചിട്ടില്ല. തലവടി പഞ്ചായത്തില്‍ കോളറ രോഗബാധ സംശയിക്കുന്ന സാഹചര്യത്തില്‍ ആരോഗ്യവകുപ്പ് ജാഗ്രതാനിര്‍ദേശം പുറത്തിറക്കി. ശുദ്ധജല സ്രോതസ്സുകളില്‍ നിന്നു സാംപിള്‍ ശേഖരിച്ചു. ജലത്തിന്റെ ഗുണനിലവാരം ഉറപ്പുവരുത്താന്‍ നടപടികള്‍ സ്വീകരിക്കും. ആരോഗ്യവകുപ്പിന്റെ നിര്‍ദേശമനുസരിച്ചു തലവടി പഞ്ചായത്ത് ആറാം വാര്‍ഡില്‍ ആശാപ്രവര്‍ത്തകരുടെ നേതൃത്വത്തില്‍ വെക്ടര്‍ സര്‍വേ ആരംഭിച്ചു. മഴക്കാലപൂര്‍വ രോഗപ്രതിരോധ പ്രവര്‍ത്തനവും സജീവമാക്കി.